فاطي سطر: اعرشوا على كدا

محمد عبدالماجد

لو ناس الهلال لملموا عدتهم وعادوا إلى السودان، وشافوا دوري النخبة قبل آخر أربع مباريات من نهاية الدوري الرواندي، ما بتجيهم عوجة.

اخلفوا كراع على كراع.

الموضوع انتهى.

اعرشوا على كدا، وجيبوا (الكأس) وتفرغوا للدوري السوداني، كمان نحن بنلعب في الدوري السوداني.

المهمة في رواندا اكتملت بنجاحٍ تام.

لو ما وقعت ليكم بالعربي، بالإنجليزية: “Game Over”.

بي مزمل أبوالقاسم: (أي دمعة حزن لا لا).

بي إسماعيل حسن: (نهواه في كل الظروف).

بي مأمون أبوشيبة: (التحكيم).

بي جعفر سليمان: (نحن في المريخ إخوة).

بي ياسر المنا: (المريخ بطل الكأسات المحمولة جوًا وسادس الدوري الموريتاني)!!

بي ناصر بابكر: (فولمو قاصر)، عشان كدا تمينا النزول بي (كانتي).

بي جمال الوالي: (اقفلوا ملف الدوري الرواندي وافتحوا ملف سيكافا).

بي سوداكال: (نمشي المحكمة الرياضية الدولية).

بي الجاكومي: (توقيع توأمة جديدة مع الأهلي المصري).

العليقي بس!!

بي الهمبتة (جغم).

بي القانون (دخل الضل).

بعد كدا نعمل ليكم شنو؟ مشينا معاكم الدوري الموريتاني… شلنا الدوري.

جينا الدامر… شلنا الدوري.

مشينا معاكم رواندا… شلنا الدوري.

نحن نعمل أكتر من كدا شنو؟

ديل مشينا معاهم دار السلام، هربوا بعد التسخينة… وبرضو شلنا الدوري.

فضيحة السواد.

مرة شالوا الكورة، ومرة شالوا عمر النمير ومجلسه.

نحن نتقطع.

من سنة 1996م ونحن في الحالة دي.

الكورة دي لو بتتكلم كانت اتكلمت وقالت ليكم: “شوفوا ليكم شغلة تانية”.

امشوا الدهب… لو لاقيناكم بي حالتكم دي في الخرطوم ما تلوموا إلا نفسكم.

كلموا ناس المريخ يشوفوا ليهم شغلة تانية، موضوع الدوري الرواندي انتهى.

قولوا ليهم بالإنجليزية: “Game Over”.

نحن فترنا من العربي.

إذا عاد الهلال من كيغالي ولم يلعب مبارياته الأربعة الأخيرة في الدوري الرواندي، أفتكر الموضوع محسوم.

المريخ لن ينستر في المباريات القادمة وكذلك الجيش.

المريخ بعد الجولة القادمة سوف يواجه الجيش.. ح يتخابطوا من أجل وصافة الهلال.

سنة يا أنا.

سمحة المقدرة.

أرجعوا ساكت… واعرشوا على كدا.. عندنا مهمة أخرى في الخرطوم.

وفي الخرطوم نحن كمان ما بنتفاهم بنضرب بالأربعة.

الجماعة قالوا بفتشوا في تلفون “كابو”، عشان يشوف ليهم مخارجة.

زيكو قال ليهم: “أنا مرقتكم سنة 1996م، سنة 2026م اتصرفوا بي طريقتكم”.

#ملف-الهدف-الرياضي #السودان #الهلال #المريخ #الدوري_الرواندي #محمد_عبدالماجد #فاطي_سطر #الكرة_السودانية #صحيفة_الهدف #لا_للـحـ.رب #السيادة_الوطنية