قصيدة القضارف

محمد نجيب محمد علي
قصيدة القضارف، كُتبت في عام 2008، وهي من تأليف كلٍّ من: الراحل محمد الحسن سالم حمِّيد، طلال دفع الله، وعلي عثمان البدوي، وشخصي، محمد نجيب محمد علي..
وصلنا أنا والراحل حمِّيد وطلال إلى القضارف في ذلك العام تلبيةً لدعوة من صديقنا د.عثمان البدوي لحضور احتفال بجامعة القضارف، وكُتبت القصيدة في أجواء خريفية كان فيها المطر يغازل الحضور، في أجواء بديعة كتبت هذه القصيدة..

يا وطن.. ما كنت عارف
قدَرِ أيه بالحيل بريدك
إلا يوم جيت القضارف
الحبيبة قريبة ليّا
القضارف بين إيديّا
الوليفة تراها ديّا
مالو دمع العين دا زارف!!
بيني بينك يا قضارف
بدَّد الحاضر مخاوف
عِزّة جاية و مجدِ سالف
وين يباعد بينا طارف؟!
شوقي شوقًا ما بِفارق
جايي داخلك ولاّ مارق
يا السماك بى خيرو بارق
بيّا وين يا عشقِ جارف؟!
الحنان طافر في وشّك
ريدي ماطر غيم يرشّك
بالأمان ضاميني عشقك
زي حمام طوَّل موالف
البفوتك يا قضارف
حالو حال رحّال مجازف
ريح شتات قدّرو المخالف
سايقو لي وين، ماهو عارف!
العسل من إيد بذورك
كلّ عاشق ليك يزورك
النسيم مرسال زهورك
وفيكِ ما أحلى القطايف
نجمة الضيف القضارف
نسمة الصيف القضارف
جمّة الكيف القضارف
ضمّة السيف يا أم معارف
يا صمغ.. سمسم.. سعاية
يا عيش وفول فاتوا الكفاية
يا عسل كل الخلايا
دي القضارف.. وأبقى عارف
يا عشم جوّاب بنيّة
باديّاه بالشوق والتحيّة
وخاتماه: ما تنسى الوصيّة
وكاتبه عنوانه القضارف
شايفه كيف يا سمسميّة!!
شلّة الرِّفقة الوفيّة!!
لما حظك ليك جابَه
نقَّطت عسل الكتابة!!
للبريدك و ليك موالف
لو “طلال” زار في خريفك
ودقّ “حمِّيد” باب صريفك
وشاف “نجيب” حضرك وريفك
كان عزف طمبور “وليفك”
وغنّى ليك تليد وطارف

#ملف_الهدف_الثقافي #محمد_الحسن_سالم_حميد #الذكرى_14 #محمد_نجيب_محمد_علي #طلال_دفع_الله #علي_عثمان_البدوي #القضارف #قصيدة_القضارف #خريف_القضارف #أدب_الرفقة #شعر_العامية #السودان #السمسمية #يا_وطن_بالحيل_بريدك #نجمة_الضيف #جمعة_الكيف #الثقافة_السودانية #الوفاء_للإبداع #شعراء_السودان #حكاية_قصيدة