حنين للبلد

د. عبد العظيم أكول

وبقيت أتاوق للنجوم

أسرج خيولي على الفضا

هل يا ترى همي العلي

إحساس كمان بالحب بدا

أو إني في عالم خيال

بهتف بقول الحب كده

وهل يا بلد نفضل دموع

تجري وتقيف من غير هدى

وأنا قلبي ما بنساكا يوم

يا روحي كم شاديك شدا

الفكر حار وعيون صغار

والمويه تجري علي الجسور

يا حليل صحاب كانو الملاذ

وصبايا في عمر الزهور

كم فيهم الطاش والبعيد

والكان معانا دوام حضور

وكل البيوت صارت خراب

ناس من حجر متل الصخور

والفات بعيد من غير وداع

يا الله تغمر قبرو نور

ما كنا فيك نحنا العزاز

وبتجلى في افقك بدر

أصبحنا في لجج الهموم

مابين صعاب أحلاها مر

لاقينا أصناف من عذاب

والحالة صبحت ما بتسر

ما كنا في النيل والجروف

في مقرن النيلين عصر

والليلة نحلم ليك نعود

تحملنا ليك ليلة القدر

يا الله تلهمني اليقين

وتلهمني لحظات من رضا

أنا مابقول الغربة دار

أطوي الهموم و أتوسدا

في نفسي هم وجروح كتار

في كل حين متمددة

الساقية والواسوق وطن

والقمري صوتو معاي صدى

أنا عمري زي غيمًا رحل

وأحلام سراب متبددة

#ملف_الهدف_الثقافي #عبد_العظيم_أكول #حنين_للبلد #شعر #الغربة #السـ.ـودان