بِنية من طعم المطر

د. الشيخ فرح

بِنية من لون القمح

ونُورها من وَهَج البروق

مسقِيه من مُوية الغمام

وصَباحها زي نَفَس الشروق

عطّرتِ بالخطوة العزيزة

جَفا التُراب

ورسمتِ في صُبح الحِلم

شُباك و بَاب

وكَتبتِ في صَدر الفرح

عِنوان كِتاب

فيهو الغَناوي

والحَجاوي

الخَدّرت فِينا اليَباب

نَلقاكِ فاتحة إيدينك

المَليانة بالشُوق والحَنِين

مُشرع وَفا

ولحظَة دَفا

وضَمّة رِضاءَ الوالدين

ومشوار وَطن

فيهو المَسادِير الحَكن

عَنْ حَسرة عَنْ مُر السِنين

جِيتِينا فوق ما نِشتَهي

صبِيّة مفتونة بْشبابها

مكسِية من توب الأرض

وماليه حُضنها من تُرابها

زي تباشير فجر لَوّن

فينا أشكال الكِتابة

وطَمّن النبض الشرد

واندس مدفون في سَرابها

حَجِينا عن حُزن الجَداوِل

والمَناجِل

وعن مُعاناة السَرابة

والقنادِيل المَحمّلة بالتعب

رويانه من عَرق الغَلابة

سُوقي العصافِير الشْكَت

تعب الرحِيل

وخَبّي القماري من الهَجير

وصالحي النحل وحُضن العبير

ورُدي الجريد

لي همسو في خد النخيل

وقُشي دمعات الأسى الواسن غيابِك

وضَمّدي الجرح النزف

لما اتسرق في الليل شبابِك

وغنّي نُورك للظلام

واسيِ أحزان

البَكَن حَرَّ الظروف

وسوْط المَلام

والقُلوب الوالفَت

ما فيها خوف

من بُكرة أو مِن مُر كلام

يابنية جَمّلتي الحروف

يا بنية ليك مليون سلام

الشيخ فرح محمد الحسن

من ديوان أمونة بت سيد احمد ود سنادة