المرتزقة

بدرالدين محمد النور

عندما طاردتنا دوشكات المرتزقة في شارع الجمهورية
(ططططط ططططط) كانت أصوات الدوشكا تطاردنا في شارع الجمهورية.. في يوليو 197‪6بعد ان انتهى غزو المرتزقة للخرطوم ولا زال الجو ملغم والتمشيط والمطاردات شغالة. جئنا للدراسة الجامعية في الخرطوم..
(شلاقة) منا قررنا نذهب لسينما النيل الأزرق لحضور فيلم (حمى ليلة السبت الملتهبة)
Saturday Night Fever بطولة جون ترافولتا مشينا كداري الدور التاني.. وفي طريق العودة الساعة 11 او 12 ونحن نتسكع في شارع النيل وشارع الجمهورية فجأة يشق صمت الليل صوت الدوشكا (طططططت… طططططت..) صاح سليمان كشة (أمممممك) ألبِدو.. انبطحوا ازحفوا.. وصرنا نحتمي بأعمدة البرندات و(نتاوق) بي عين واحدة باتجاه الصواريخ الباليستية التي تستهدف التشكيليين والتشكيل وعندما يتوقف (القصف) نتحرك من عمود إلى عمود وتاني تسمع (طططططت… طططططت..) ونلبد واتأكدنا ان المرتزقة قصدونا (اتشهودنا) وقلنا الروب واعترفنا بي ذنوبنا وتبنا من السينما خاصة الدور التاني.
ونحن نقفز من عمود لي عمود ومن برندة لي برندة فجأة كدا نسمع أصوات ونسة ونشوف مصدر الصوت (طططططت… طططططت..) لا دوشكا ولا يحزنون ولا يرجفون.. طلع صوت ماكينة قطع الزلط وديل العمال برقعوا في ظلط شارع الجمهورية.
الزميل علي قبة مات بالضحك (اولاد ام زقدة) (ما قلتو نوبة).. قلتوا لي جون ترافولتا مالو؟ جون ترافولتا منو؟ نحن وين؟ تاني تجو السينما؟!