رحلتي إلى مصر (1)

محمد ساتي حمد
في سنة من السنين، والفقر معشعش في جيوبي وأنا طالب في جامعة الخرطوم، “الجميلة ومستحيلة” في الزمن داك. بعد زارونا زملاء مصريين وكلمونا عن مصر وجمالها، وحنّكونا بـ”مصر أم الدنيا”، قادني قدري إلى التشبّه بالأغنياء! نعم، إذ وقعت هذه القصة في فترة من فترات عمري اليابس! إذ وسوس لي صديقي الذي كان يدرس في مصر بفكرة السفر لمصر..
إضافة إلى الصورة التي دخّلها جوانا الطلبة المصريين الذين زارونا في الفترة ديك، وبين الفقر والحلم، استطالت إذناي كم سنتمتر مربع كدا، وقلت ليهو: “موافق، بس القروش يا فردة من وين؟ الكاش لا يأتي من العدم!” قال لي: “بنمشي بالقطر لي حلفا، ومن حلفا لي أسوان بالباخرة، ومن أسوان للقاهرة بالقطر، وكدى بتكون التكلفة قليلة”، قلت ليهو: “سمح، بس ديل ذاتهم ما عندي!”
المهم، من جاي لي جاي ربك فرجها بفكرة التصاريح الزمن داك! وفعلًا لقيت لي زول طلّع لي تصريح مجاني من مؤسسة الكهرباء، للسفر من الخرطوم لحلفا والعكس! حمدت الله واتشجعت، لملمت حق النثريات من حر مال أبوي الله يرحمه ومن أخوي، وحزمت بنطلون جينز، وأنا يازول مبسوط.. في اليوم المحدّد للسفر اتقمصت شخصية السائح “بالضولارات”، الشنطة كيف، والجينز وبس ما في غيرو، يعني لو اتسرقت ذاتو بشكر الحرامي البسرقني!
أها وصلت القاهرة بعد رحلة مضنية من تراب قطر لي قطر وتعب الباخرة، وبعد ارتحت قمت لفيت القاهرة ومشيت الأهرامات وصاحبت خواجات، لمن لوني قلب أبيض زيهم، وروح تقمّص السائح امتلكتني وتمكنت مني زي الملاريا لمن تسخن بيك! المهم عشت الدور، لكن بصراحة في سر عاوز أقوله وما عاوزكم تضايقوا ولا تكلموا زول، لأنو لكل سائح وجهة نظر!
الأهرامات ما عجبتني بصراحة هههه! ياخي حجارة بس، ما فيها شي تاني.. الابتسامات والدهشات العملتها قدام أبو الهول والموميات الشاعر الدوش ذاتو ما حصلني! المهم تميت رحلة الأهرامات، وفي سري نعلت أبو الهول وأبو أمو ذاتو.. الصنم الصامت الفقر النقر الما ونسني! تميت الرحلة على مضض، واتصورت مجبورًا ومكسورًا وشرّطت الصور كمان..
المهم قضيت حوالي أسبوعين في مصر كسائح، وضولاراتي زهجت، وقلت خلاص مليت، وخشيت في دور وطور متحور ومتهور، وهو البحث عن وجهة سياحية أخرى! أجي؟! من وين الكاش يافقران انت! ولا انت ما انت يا البتلبس تموت تخلى! الحمد لله اتشهودت واستغفرت وطردت الفكرة بعد ضربت حساباتي الصفرية زى صفر الهلالاب!