شاي غير مناسب مع السُواقة

أمل عمر

بما إنّ ناس بيتنا جنّهم شايّات غريبة وأعشاب، عندنا دولاب في المطبخ مليان شاي من بلاد الهند والسند والصين، ومن مدغشقر، وأستراليا، وسيراليون، وجزر القمر.

أمس وصلنا أوردر شاي جديد من أمازون. شربته حوالي الساعة 8 مساءً وأنا أحضّر مسلسل (المرسى)، والمفروض إني منفعلة بيهو شديد وما بفوّت يوم من غير ما أشاهد حلقتين تلاتة.

حسّيت إني نعسانة لما بيغادي، على قول الزول داك. طوالي طلعت أوضتي ونمت، وما من عاداتي أنوم سريع كده؛ لازم أفكّر في مشاكل العالم، وجُزره النائية، والمخلوقات الفضائية بتاكل شنو؟ وهل عندهم فنانين بيغنّوا في الأعراس؟ عمر الضفدعة كم؟ وليه أنا أنا؟ وأبستين اقتـ.ل ولا انتحر؟

نمت، وما صحيت إلا الصباح، وأنا المعروفة بالسهر، والما بنوم قبل 5 صباحاً. أول مرة من اتزوّجت ألقى العِدّة في الحوض! جنّي وجن منظر العِدّة في الحوض.. بعمل لي حالة نفسية..

ولدي قال لي: لما شرب الشاي حسّ بخدر ودوخة.

طوالي جريت لبست نظاراتي وقريت المكوّنات، قلت: أكيد فيه بنقو، أو خشخاش، أو مصيبة ما!

ما لقيت الحاجات دي، لكن لقيت أسماء غريبة ما عرفت منها إلا زهر الليمون.

المهم، الشي ده خطر. مفروض يكتبوا عليه: ممنوع شربه مع السواقة، لأنه ممكن يسبّب مصيبة.

#ملف_الهدف_الثقافي #أمل_عمر #يوميات #صحيفة_الهدف #السودان