مهادن الزعيم
#ملف_الهدف_الثقافي
بعد وفاة الفنان الجميل محمود عبدالعزيز بتاريخ 17 يناير 2013م، ومع حالة الحزن العامة لدى الأغلبية، فجأة انتبه البعض لشعبية محمود الجارفة، فـ”طوالي” ركبوا مكنة إنهم حواتة من سنة دو!
تلقاهو الواحد كان داير يأشر للمواصلات، بعمل علامة الحوت عشان يقول للناس إنو حواتي، مع إنو في حياتو ما بكون عارف نادي التنس في بحري ولا الخرطوم!
وطبعًا النوعية دي عشان يقنعك إنو حواتي، تلقاهو حفظ ليهو أغنيتين للحوت بعد وفاته (وغالبًا بكونن أكتر أغاني بتتردد)، ورفع في بروفايلو تلاتة أربعة صور ليهو، بعلامة الحواتة في تأبين الحوت بنادي الضباط، لأنو عمره كلو ما حضر حفلة لايف للجان.
غالبًا لما أصحابه كانوا بقولوا ليهو: “أرح حفلة محمود في نادي التنس”، كان بقول ليهم: “محمود شنو ياخ؟ في قونة ظهرت جديدة عندها حفلة نااااار في حلتنا وأنا ماشي احت النبق النبق النبق!”.
النوعية دي غالبًا تلقاهو بتكلم عن الأحداث الحصلت في حفلات الجان بضمير الـ”أنا”، ولازم يحشر نفسه في نص الأحداث، وببدأ كلامه: “لما كنا بنحضر حفلات الجان في نادي الضباط”.. ولا يقول ليك: “في مرة مشيت لي محمود في بيتهم جنب ميدان المولد”.. وطبعًا هو عمره ما شاف البيت، لكن حافظ الوصف عشان يقنعك إنو بعرف محمود! (مع إنو بكون عرف وفاة محمود تاني يوم الصباح من حالة رافعاها بت جيرانهم).
يلا النوعية دي ممكن عادي في يوم من الأيام، لو الترند بقى أحمد الصادق ولا البندول ولا حتى منى موروكو، حتلقاهو نط معاهم، وممكن يكتب بوست يعلن فيهو إنو ندمان على إنو كان بيحضر حفلات الجان، وإنو هو أصلًا بندولي ولا موروكابي ولا كجونكابي!
ويزيدك كمان: إنو أغنية “ديل بالكلام شالو الذنوب” أحسن ألف مرة من “سكت الرباب”!
وإنو الكلام البتقولوا موروكو في بداية الأغنية أفضل من التوزيع الموسيقي في “سكت الرباب”!
اها، النوعية دي ما تركزوا معاهم شديد، ولا تشتغلوا بالبيكتبوهو عن الندم والهبل دا، لأنو الحواتي الحقيقي مقياسو أغاني الجان وكلماتها وألحانها وتوزيعها الموسيقي، حتى لو عجبو لحن عند فنان تاني، ما بيركز على حياة الجان الشخصية ولا بيتخذها مبرر، لأنو بهمو محمود الفنان.
المهم، الناس العاملين فيها إنهم ندمانين على إسقاط البشير، بنقول ليهم: “إنتو عرفتوا وفاة الحوت من بت جيرانكم الصباح، فـما تقنعني إنك كنت بتشرب شاي الصباح مع حاجة فايزة وبتوصل حاتم وحنين لترحيل المدرسة!”
لو عايز ترفع إصبع التكبير، اتفضل، ما في زول مانعك.
لكن ما تحكي أحداث حفلة ما حضرتها عشان تكبر كومك.
.. عَجبي!
#مهادن_الزعيم #محمود_عبدالعزيز #الحواتة_المزيفون #قونة_النبق #الجان #أغاني_الحوت #الترندات
Leave a Reply