مفاعل الغرام

شعر: سارة منوفلي
#ملف_الهدف_الثقافي

ما كانت الأقدار يومًا تشتكي
الصبر مخلاة اليقين
والعنده مفتاح الدرب
صوت مطره
من رعده بيبين
الشدة منك وابتدت
بعد الضهر ميل
عليكي وانتكى
ما خاب ظنونك يوم
ولا خلاكي فات
العنده زيك ما بيحمل
فرقتك… إلا الممات
والكان خليل كل الظروف
القاسية قبل الحلوة
أهداك توب زفاف
والكون ضحك لكن
مدار الدنيا دار
خاف واستخاف
ما حالي زي كل الخلوق
ثابت مقيد في ترابك
بالعروق
وبحن سمار…
وبحب… نهار
زي شمسك المتدفقة
وعسلي العوينات الصغار
المتلي كيف يقدر يفارق
أنا لسة في شانك بعافر
والبدافر…
في رصيف الانتظار
كاوياني نارك…
يا منارك
يا دليل كل الحياري
الحية ناره
يا وقارك
كنت لمن… كنتي إنت
وانتهيت لم بدت
منك ملامحي تضيع… وجع
لمن خلاصك…
يبقى مرهون البخونك
وكيف خلاصًا ببقى دونك؟
هو البنى… بيناتنا سور
همنا… من جنة نبني
سور محصن دمنا
من وهج إيمانا
إنك مننا
يمتده نور
عابر حدود الظلمة لي
حتى القبور
والليلة يا ست دنيتي
واليوم وباكر والفجر
والأمس والراح والعصر
واللحظة والذكرى التمر
أنا هاهنا… واقف طريقك
ديدبان… ريد… ما سلاح
حاميك وحارسك… بالكلام
أصله الكلام… أول مفاعل
في الغرام
والجملة اسمية وخبر
النال هواك وصل القمر
والفاعل المرفوع صبر
يا ست لغات الدنيا
من نوبة وعرب
بهواك بدون ما أفهمك
من غير أشوفك برسمك
بي ودعة في ليل الشعر
بتضوي فاهك تبسمك
أرمي الحبل
خليني أمرق من جحيم
الانتظار

الإسكندرية 2 أغسطس 2025