الثرثرة

مدني النخلي

وتعبنا من كتر الكلام
وين الفعل؟؟
تربط تحِل..
من غير تكورك
وتنفعل
قِل الكلام
زيد الفعل..
ليه الهبات؟
ليه الرغيف من يد غريب..
والأرض عندك ما بتخيب..
غرزت غنيمات العشم
يوم جفّ في الضرع الحليب..
المويه في الضراع
ثورة وولد..
أدّوه حق يزرع
مساحات البلد
وبدل تمدوا اليد
مدد..
زيدوا المزارع بالعدد
المصنع الواقف زمن
نأهّلو نصّين المكن
ما يبقى شعبنا للهبات
مستني ضايع مُرتَهن
قلّ الفعل كِتر الكلام
نشرب كلام
ناكل كلام
نزرع كلام
نصنع كلام
نحلم كلام
وتعالوا نسأل باحترام
يا سلّة غذاء العالم
والعالم رماك بايظ
متى تعرف مقامك
وقدرك وشنو عايز؟؟
إنت الما ضعيف لين
كتير خيرك وما مهين
كنوز ونعمة للشبع
كان مطمور وكان بين
ولا زال السؤال قائم
لَمتين تعب والشوف طشاش؟
سدّدنا نحوك يا هدف
وسهمنا طاش
ضجّت مداينك بالصفوف..
واتغيّر البوح الولوف
سُحب الهموم حولك تطوف..
ضاقت خلاص قِست الظروف..
قلّ العمل كِتر الكلام
وين الحكايات الزمان
الغنّت الحب والوئام
تقل الحمل وتشيل هموم
شالت من العين المنام
يا ساسة الزمن الصعب
سمعًا وطاعة وبأدب
جرّمتوا صوتنا المطلبي
والانتقاد حق انسلب
قلنا خير ورضينا
متجرّعين غبن ورهب
قلّ الفعل كِتر النضم
ناكل وعود نشرب وعود
نركب وعود
فاقه ومجاعة بلا حدود
يا واقع الألم الأليم
شدّوا السواعد للأمام
سيبوا الكلام
ولينهض الوطن المضام
قوة وإرادة مع السلام
سوّاي وما حدّاث ظنون
الثورة في حدق العيون..
دم الشهيد كيفن يهون..
ما جدوى هذه الثرثرة..
متقدمين ومحال رجوعنا إلى الوراء
فإلى الأمام..
يبقى الفعل قيد الكلام..
إلى الأمام..