مداد الوجع.. صاعقة الكلام

شعر: حماد يونس كوكو
#ملف_الهدف_الثقافي

أمبارح ما أغوانا الليل
والليلة ما بجرفنا السيل
رغم الجوع
صبرنا نبيل
رغم الجوع. نحن دروع
هزالنا شرف
لسنا الكم.. نحن النوع
مافي خضوع
مافي خنوع
والمنبع نفس المنبع
في أكتوبر وفي أبريل
نحن صناع الثورة العاتية في ديسمبر
بدون تقليل.. بدون تهويل
بدون تدجيل
نحن الآن ونحن قبيل
نحن القلنا عندك خت ما عندك شيل
مافي رجوع
هزمنا الليل..
صبرنا جميل
نشد الحيل
نشيل الشيل
فهمنا دليل
دلنجنا جليل
وناسنا عزاز زي “الخيل”
جلال وشموخ بدون تطبيل
وجيل وراء جيل
ورغم الجوع
دلنج سودان
دلنج إنسان
صبرنا طويل وباقي قليل
ويا للويل
لو بكرة انهد جرف السد
واتلاقى مطرنا بموية النيل
ومرق الثائر من بطن الحوت
معاه عهود وتوقيعات
فيه بنود.. معاه شهود.
وباقي قيود
من زمن التيه والترحيل
معاه أسامي بدون تجميل
معاه خريطة فيها وطن
كله غبار كله نزوح كله رحيل!
وفيها جغَب مسكونة دخيل
وفيها سبيل
وفيها بديل
يا أنسام الوطن الغالي
ويا إنسان الفهم العالي
بنادي عليك…
رغم الجوع
وكل القالو في المشروع
وفي الممنوع
دلنجنا جمال دلنجنا كمال
دلنجنا بشيل المابنشال
بنادي عليك يلا تعال
أنسى الخوف وأنسى الجوع
يلا تعال….
شمالنا تعال.. جنوبنا تعال
غربنا تعال… شرقنا تعال
وسطنا تعال
وكلوا تعال دلنج سودان
كلوا تعال وشيلو شموع
وشوفوا الحال الما في البال
ليلنا حصار.. صباحنا حصار
نهارنا حصار
تحتنا حصار وفوقنا حصار
نمل القنطور فينا احتار
فار الكنتين فر وطار
مافي دخول مافي خروج
أكثر من عام
لا شاي لا سكر وحتى شمار
شبابنا الطلعوا طلعوا كتار
صغارنا الماتوا ماتوا كتار
طافين المنقَد ولداية النار
بينا وبين القصر العالي مدار
راجين الفزعة بين متيقن
وبين محتار
شنو البفرقنا من ناس مدني
وناس سنار ؟؟
“والعقدة” نفس العقدة
شادد حبله في المنشار
نفس القصة والمشوار
ولا دربنا حلتنا فيه خيار ؟؟؟؟

(يتبع بقية النص لطوله)