عندما يختلف فرعون وهامان.. يربح قارون وينتظر الناس موسى

خالد ضياء الدين

كنا جماعة وكانت رابحة معانا

رابحة البت الطلعت من توب الحلة قاصدة الصي، مرقت تجري، ما هَمَّاها حفيها ولا دوس الشوك، لا وسوس ليها إبليس ولا قالت أحي.

مرقت جارية مسافة جمل السير صباح وليلة لحدى المهدي السيف والدرقة والنجمة الفوق رقاب الغاصب، مافي تعب نحن متاعب.

جماعة بتعمل وجماعة تعاين

جماعة تشجع وجماعة بتحبط

جماعة بتدفع وتانية تشنكل.

ونحن اخترنا نكون الطلعة الما بتتوقف، الهيبة وضل الشاتي، سن الفيل والأبنوسة، وعزة المامكرية. نخلة تشابي بتشمخ، هزة قربة، اللبن الرايب، عصيدة الجار المافيه هظار، وقلدة قوية.

اتلمينا..

قلنا الدنيا ح.روب ودمار، قالوا كفرتو، دي كرامة..

رابحة وكمين بت، اختاروا الصي، تانيات اختارن موية النيل الغرق والخافن قعدن مجبورات.

بالله دا كلام؟!

كيف الزول يفتش أخته، يشفشف أخته، إنتو ما ربوكم بي محمد وفاطنة السمحة، ما حجوكم بالغول والولد الشاطر، ما نهروكم وإنتو أطفال؟

حاجة عجيبة!

في نص السكة رابحة لاقت ماندي لابسة السكسك متحزمة تب وشايلة الشيلة بت السلطان، حبابك أختي الغالية، حباب المرقة إن كان البلد بيعاني، بخيت اليوم اللمانا وما فرقنا، حباب الغيمة وضل المطرة.

كانت الساعة جفير سكين، كرامة زول عيان، كفارة وصدقة. حرم تتفضل ناقصاكم حاجة.. العيش يا محمد، قرب طبق الكسرة، جردل ويكة وصحن الدمعة، الله لا جاب الدمعة، كب لي عمك شاي.

الفنان بهناك يغني، والمداح في الصالون.. نسوان يخدمن وتانيات لابسات التوب البلصف، والبنوت اتلمن ضحكة وونسة، أحلام العشق الما بالهين.

بالليل، بعد الهجعة والناس تعبانة، نطوا علينا حرامية.

اقلع، اختف، أضرب، وهدد.

كانوا كتار زي الهنشل، مننا لكن جاروا علينا، دم ولحم، الدم الاصبح موية.. ديلاك هبشوهم، والاتنين هبشونا. وجماعة “السي اي ايه” ياحميد فرقونا.

ناس الحلة التانية ما فزعونا، ما هماهم صوت أطفالنا، جري النسوان، هم ذاتم دخلوا علينا كشفوا الحلل المدسوسة، الكانوا أحباب اتحولوا سوسة بتنخر في حيطان البيت السقف البرش الدوم، همها التحت الأرض، نحن الفوقها ما همية.

دي خيانة عجيبة القصدت تفرق شمل الناس وتنهب خيرا.. حاجة مريبة تحير تشيب راس الكافر سيبك من أطفال شافوا الهول والموت وضاقوا مرارة الذل، الجوع السكن ضلوعهم دنقر راسهم.

وينك رابحة وين بت السلطان، وين ناس الغنت ضد العين الخضراء الحقارة، الشعر الأشقر، والغليون، التبغ المستورد مامن طينا، واختارت ريحة البن والقنانة، وينو خليل العازة، وينها البت التلت إيدها ومرقت تزوزي حمامة، والطلعن كمبلن، مربوط النص بي دبارة.. يا الله كيف الدبارة.. والراحن غادي خلن بيتهن اختارن بيت تاني وقالوا خلاص نحن بلد وإنتو التاني.

الليلة الناس محتارة

كل زول بتلفت كايس إلفة قديمة.. الناس طلعت ما عادت، خلت باقي طعاما وكل هنداما.. خسرت كل حاجة، بس كسبت روحها الغالية.

الناس القعدت متهمين من الطرف التاني، المرقوا متهمين، العايش والمات والمسجونين كلهم واحد في عين الاتنين. وهم في عيونا دمعة وطلعت، مابترجع لو جات الصين.

إلا باكر أجمل حتمًا

باكر أحلى

لما نغني مع عاشة يجو عايدين، بالقلم والسماعة والمسطرين، بجو عايدين.