حلم العُمر

د. الشيخ فرح

دَهّابة في الزمن الصَعب
مارقين من الضِيق والتعب
شايلين زوادة
دقِيق وزيت
وجهاز يصِفِّر للدَهَب
صَفّر كثير يوم وقفوا قِدام بِتْ وَهَب
فِدوة وسُوار
وخاتمين كُبار
وصَفّر كمان جنب العَجَب
ماعندو سِنّين من دَهَب
يا للعَجَب
دَهّابة ساعين للسِتر
والا قاصدين اليقين
واحد من الدَهّابه ديل
مستور وكافِل أُسرتين
أُمه وأبُوه وإخوَته
وأخته المطلّقة من سنين
وثلاثة أولاد يوم أبوهم
ما رَجع في يوم حزين
رجعت سِطُوره القاسية
ممهورة بيمين
بالإنفصال من أسرة
ما كانت بِبالُه
ولا بْضُله بتستعين
لي وين مَرق
شِقِيش مشى
خَطواته ما معروفة وين
والثاني من بلداً بعيد
والصِنعَة كانت
خمْج طِين
طِين في الأرض
وطين في الحِيَط
حتى الحظوظ معجونه طِين
ما راضية تَصِدِق أو تلين
والثالث المجهول مَسطّر في الجبين
وضمير نَضِيف
وقُطيّة مِن قَش الصرِيف
مبنية فوق قيف تُرعة
لو للتُرعة قيف
شباك صغير
والباب كبير
وعَرِش خفيف
رقراقها صيف
والموية تدخل في الخريف
والضيف يجيب في يدو ضيف
والرابع مرافيد النظام
دوغري ونظيف
كانت حياته مرَّتبة
من صبحه يرفع للتمام
ويقدح يسابق في الزمن
من يبدأ لي آخر الدوام
وفي يوم حَضَر
أدو القرار
مفصول ومن غير إعتذار
من دون كلام
زملاءوا دنقروا بالسكوت
أصلو الكلام
حيجيب كلام
وفي (قبقبة)
إتلاقت خطاوي الأربعة
إتلاقوا في نُص الطريق
قاصدين مناجم في الخَلا
ما أظنه زولاً يِوصلها
فيها اللِقا
وفيها البَلا
فيها السريع جيبو إتملا
وفيها الرَجع
شايل الوَجع
قَصّر طريق التلتلة
إلا الشباب الأربعة
من همهم قِصِر الطريق
غابت خُطاهم عن بيوت الناس
وعن آخر فريق
اسبوع مَشِيهم ما وَقف
بس لي أكل
أو لي صَلاة
أو لي سُؤال البوصلة
ماشين ويِمسحوا بالجِهاز
حفروا الأرض
و لمّوا التُراب
و كَم (بَروة) فَكّة ليها رِيق
لكن مُناهُم في الغرِيق
لو يتفتِح في الظُلمة بَاب
وتدخُل تباشِير الفجر
ويوم الجهاز بدا في الرَنِين
مِن صوته قَرّب يِنصهِر
زادوا الحَفِر
كَمِين مِتر
وجَاتُم بُشارات الخلاص
لَمَع العِرِق
زيّ البرِق
خَطَف البَصَر
خلينا نوصل للغريق
ما دام لَمَع طَرَفُه وظَهر
فِرْح الشباب
الخير وَصل
والفكة من يد الفَقُر
الكان بيحفر ما وَقَف
والثاني قال
وَقّف حَفِر
أمِّن طريق مرقَتنا قُبّال الدِخُول
خلينا نتلافى الخطر
لكنه واصل حَفَره
كيفن يِنكسِر
دي الفَكّة مِن يَد الفَقُر
و فجأة انهدم وَسَط النفق
ووقعت حِجارة من الكَتِف
ونزل الغبار مِنّ السقِف
والشوف صِعِب
تاه البصر
كيف الطلوع غَاب الأثر
وانهدم نفق العُمر
راح العُمر
وفجر الحلم أصبح قبر
وفجر الحلم أصبح قبر