نصوص خالدة: ماهو عارف قدمه المفارق

خليل فرح

ماهو عارف قدمه المفارق
يا محط آمالي السلام

في سموم الصيف لاحلو بارق
لم يزل يرتاد المشارق
كان مع الأحباب نجمه شارق
مالو والأفلاك في ظلام

يا دهر أهوالك تسارق
منها كم كم شابت مفارق
ما علينا الفات كله فارق
رُقنا ولاَّ نعيد الملام

من حطامك أنا غصني وارق
فيَّ شِنْ أبقيت للطوارق
غير قليبا في همومه غارق
ولسانا بَرَدُه الكلام

ويح قلبي الما انفك خافق
فارق أم در باكي شافق
يا أم قبايل ما فيك منافق
سقي أرضك صوب الغمام

يا بلادي كم فيك حاذق
غير اإلهك ما أمَّ رازق
من شعاره دخول المآزق
يتفاني وشرفك تمام

مسرح الغزلان في الحدايق
والشوارع الغر والمضايق
قول لي كيف أمسيت دمت رايق
ودام بهاك مشمول بالنظام

مجلس اللذات في النمارق
والترف لا زال وصفه خارق
ضاري حسك فاح جانا مارق
ولاَّ قاطعو الريح ما هو لام

في يمين النيل حيث سابق
كنا فوق أعراف السوابق
الضريح الفاح طيبه عابق
السلام يا المهدي الإمام

أين مني الودعته شاهق
باكي ناهد لسه مراهق
عيني ما بتشوف الا شاهق
أين وجه البدر التمام

أين مني الفي زهوه باسق
في شبابه نقي من مفاسق
بين ثيابه البيض المناسق
حولك أشبه رتل الحمام

يا بريد الجو فوقي حالق
ميل عليَّ الروح ليها خالق
عدت سالم قول وأنت عالق
مقرن النيلين كيلو كام

الحبايب لفتوا الخلايق
بيني وبينهم قطعوا العلايق
إن دلال إن تيه كله لايق
نحن ما مجَّينا الخصام

يا جميل يا نور الشقايق
أملأ كأسك واصبر دقايق
مجلسك مفهوم شوفه رايق
عقده ناقص زول ولا تام

من فتيح للخور للمغالق
من علايل أبروف للمزالق
قدله يا مولاي حافي حالق
بالطريق الشاقو الترام

ما يئسنا الخير عوده سايق
الحي يعود ان أتي دونه عايق
الي يوم اللقا وانت رايق
السلام يا وطني السلام