نصوص خالدة: هما مين وإحنا مين..؟

أحمد فؤاد نجم

هما الأُمرا والسلاطين..
هما المال والحكم معاهم..
وإحنا الفقرا المحرومين.
حزّر فزّر.. شغّل مخك،
شوف مين فينا بيحكم مين؟!
إحنا مين وهما مين؟
إحنا الفعلًا البنّايين،
إحنا السُّنّة وإحنا الفرض،
إحنا الناس بالطول والعرض،
من عافيتنا تقوم الأرض،
وعرقنا يخضّر بساتين.
حزّر فزّر.. شغّل مخك،
شوف مين فينا بيخدم مين؟!
هما مين وإحنا مين؟
هما الأُمرا والسلاطين،
هما الفيلا والعربية،
والنساوين المتنقية،
حيوانات استهلاكية،
شغلتهم حشو المصارين.
حزّر فزّر.. شغّل مخك،
شوف مين فينا بياكل مين؟!
إحنا مين وهما مين؟
إحنا قرنفل على ياسمين،
إحنا الحرب حطبها ونارها،
وإحنا الجيش اللي يحررها،
وإحنا الشهدا بكل مدارها،
منكسرين أو منتصرين.
حزّر فزّر.. شغّل مخك،
شوف مين فينا بيقتل مين؟!
هما مين وإحنا مين؟
هما مناظر بالمزيكا،
والزفة وشغل البوليتيكا،
ودماغهم طبعًا استيكة،
بس البركة في النياشين.
حزّر فزّر.. شغّل مخك،
شوف مين فينا بيخدع مين؟!
هما مين وإحنا مين؟
هما بيلبسوا آخر موضة،
وإحنا بنسكن سبعة في أوضة،
هما بياكلوا حمام وفراخ،
وإحنا الفول دوّخنا وداخ،
هما بيمشوا بطيارات،
وإحنا نموت بالأوتوبيسات،
هما حياتهم بمبي جميلة،
هما فصيلة وإحنا فصيلة.
حادي بادي يا عبد الهادي،
يا اللي عليك قصد الغنوة دي،
لما الشعب يقوم وينادي،
يا إحنا يا هما في الدنيا دي.
حزّر فزّر.. شغّل مخك،
شوف مين فينا حيغلب مين.