لسّه فاكره

حنان شاهين

لسّه فاكره
البيت بتاعنا من زمان
لسّه فاكره
بيوت حارتنا ومصطبتنا
والحصيرة الخوص ولمّتنا مع ولاد الجيران
لسّه فاكره ستّي نعمة
كانت حواديتها بتطبطب على كتف المسا علشان ينام

#اضغط_الرابط_في_أول_تعليق:

لسّه فاكره حكاية الشاطر حسن
وحكاية البنت اللي بتحب السهر
واللي سايبة ضلّها على سطح دارنا
وطلعت فوق تبعت رسايل للقمر
لسّه فاكره نجمتين
يبانوا حبّه ويستخبوا ورا سطح عم الشيخ أمين
لسّه فاكره عيون إيمان
وهي بتصحّى العصافير النحاس
في شباك السرير كل يوم الصبح بدري
لسّه فاكره
لما كانت الشمس تشرق من غيطان القطن
وتصحّى اليمام اللي كان بيسبّح الخالق زمان
زي صوت عمّ إسماعيل اللي كان بيفتح النور لمواله
ويزهر الياسمين ويعطّر النسمة اللي بتسابق غناوي الفلاحين
لسّه فاكره
عطر وردة حمرا مطبوعة على فستان حرير
لسّه فاكره فيونكة بيضا
كل حبّه تفكّ من شعري وتطير
لما كنت أجرى وأطير زي فراشات الربيع وسط الخضار
لسّه فاكره
لما أمي كانت تشيلني فوق كتافها وتمشي بيّا
ولما كنت أبقى صاحية وعاملة نايمة
ولما كنت بنام بجد وكان مفيش لخيالي حد
لسّه فاكره
لما كنت أطلع أنا وحبّة عيال فوق غصون الجازورينة
لسّه فاكره غصن فيها كان مطاطي عوده لينا
كنت أحسّه يخاف علينا زي جمّيزة ياسين
وزي كل ناس بلادنا الطيبين
يااه..
يا دفا البيت القديم
ساعات بيملى الحنين
أقايض العمر اللي جاي واللي فات
وأرجع أقضي هناك ساعات

• شاعرة من مصر

#السودان #ملف_الهدف_الثقافي #صحيفة_الهدف #شعر #عامية #حنان_شاهين #مصر #ذكريات #أدب_عربي #حنين #البيت_القديم #Sudan #Egypt #Poetry #Literature