واحد جميل

سيد أحمد الحردلو

– 1 –

تاني قام واحد جميل في بلدنا.. مات

وكان بغنّي للمساكين، والمسؤولين، والحُفاة

وكان بغنّي للمنافي، والعصافير، والرعاة

وكان بغنّي لبلدٍ في الحلم.. جاي أغنيات

وكان بطنبر، وكان بدوبي، للحياة

– 2 –

تاني قام واحد مَلِك.. روّح وفات

وكان مَلِك في الريد، وإنسان في الصفات

وكان مهاجر في دموع كلّ البُكاة

وكان وترًا مشدودًا، ومسكون دندنات

وكان، عليه السلام، تقول ما زول حياة

– 3 –

يا مصطفى..

فاكر الجماعة الكانوا ساكنّك دوام

من منفى لمنفى

ومن عود لسفر

فاكر العصافير المسافرات دون جواز

فاكر الّلي داجّين في المطر

عبد الرحيم.. وهلمّ جر

فاكر القطر

فاكر النخيل، فاكر الحراز

الليلة كانوا جميع هناك

قسمًا يمين، كان الجميع باكين عليك

كان المطار فارش عليك

كان الجميع مشتاق إليك

يا سلام عليك

لمّا تكون زولًا عزيز

عن ناس عزاز

– 4 –

يعني كان لازم تفوت

والحزن مشرور في البيوت

والدنيا ما زال فيها حوت

وفيها لِسّه عنكبوت

يعني كان لازم تفوت

وتخلّي أوتارك سكوت

ولسّه عندنا ريد جديد

ولسّه عندنا ليك قصيد

.. يعني كان لازم تفوت

وتخلّي هذا الحب يموت؟

– 5 –

يا سلام عليك

لمّا تكون زولًا عزيز

عن ناس عزاز

يا سلام عليك

#ملف_الهدف_الثقافي #سيد_أحمد_الحردلو #مصطفى_سيد_أحمد #ود_سلفاب #صحيفة_الهدف #السودان