أغنية مصطفى سيد أحمد

عفاف الصادق حمد النيل

 

يا الكحّلت عيون الدنيا بلون الغنوة،

يا الضفرت ضفاير إحساس الكلمة الحلوة.

يا الشتّت نجوم الليل في وشّ النيل،

عِقدًا فوق القَمرة بيقدح فينا الضو.

يا الطقطقت أصابع السحب الشالن جو،

دفق عسل المطرة ونُقَط كبت شو.

نضمت وغنّت، سكتت وصنت،

قامت وقعدت.. شن بتسو؟

واقفة تلملم فوق النجم اللّم حداها،

نسجت منو الضل الخَتّ وباقي ضراها.

فتقت منو الشدرة الشال انحت جناها،

سوت بيهو الهدم، الصلحة وسترة غطاها.

واقفة تحزم، باقية تلزم خيرًا جاها؛

إيدها تسلم، تدي وتعلّم، ترفع جاها.

تهدي وتكلّم، صوتها يرنّم،

يزيدها وجاها.

 

وغنّت ليك الغنوة السمحة

الما بيها تتم.

اتضارت عين القَمرة تتأوّق

من بينات براق الضو الفاتنا وقبل.

من عمنول لو ما صد، ولو ما رد،

ولو ما جانا، ولو ما عد، ولو ما لو.. شن بتسو؟

 

تقشقش فوق رقراق الدمع الكاسي العين،

بي هدم الدم؛ كل ما اتعرّى يجدّد توبو.

يضاري الريح الكست الجو،

تتساقق بين تيار الموج الكسر الجدول، دفق شو.

تسارق فوق نجماتن برقن هِجِن لِجِن باتن قو،

تضاير فوق وديانا نزن وندن شبعن رضَعن

ضرع السحب الشلن درن جو.

 

تتصنّت تسمع غنوة ود سيد أحمد؛

جانا مهقت، مكسي مجرّتَق،

يفوح الصندل وعطر المحلب منو مدفّق.

أمّو تعدل، أختو الرقصت،

خالو يبشّر وعمّو بيعرض،

وسط السهلة وخيرو مدفّق.

غنوة بتعزف، نغم اتشتّت،

رعدًا صفق وبرقًا هز.

اتباطن سوطو بطانًا حر،

لوح وهو، وضهر الفارس التب ما اتلوّى.

زغرد ليك إيقاع المطر،

اتلبّب حضن الأرض ونلم.

 

ود سيد أحمد دقّ المحلب في توب أحمد،

عطّر بيهو الكلمة الحنّت،

وهنت ورنّت، طارت وركت جوه القلب ركّزت تب،

وقالت: شيتن ما بتقال.

ود سيد أحمد دقّ المحلب جوه الفكرة،

وخت الذكرى وذكرى بكرة؛

أبيّة وحُرّة، مبدأ وعِزّة،

قيمة وعِبرة، دراية وخبرة.

شامخة وبِكرة، شموخ بت عِزّة

الما بتهز برغم الصي.

وليد ضكران هزّ ورزّ وتِبّ ما فزّ،

اتقطر نِزّ واتدفق ضي.

 

ود سيد أحمد شال الريشة، رسم اللوحة،

وشتّت لونها وتيرب بيهو سما السودان.

وكانت النبتة عصارة الغنوة

الفيها ثقافة وحب وسياسة؛

مزيجها بلدنا وفيها ولدنا،

اتعطّن الريد والبت الحلوة.

الوطن الغالي،

وسرّج بيهو وشدّ ضهر

سودانا لجام.

#ملف_الهدف_الثقافي #عفاف_الصادق_حمد_النيل #مصطفى_سيد_أحمد #ود_سلفاب #صحيفة_الهدف #السودان