استمع: جِنًّا تعرفو

شعر: مدني النخلي
#ملف_الهدف_الثقافي

ترجع لو يخونك شوف
تفتش في الرميتو وراك
دي نفس الخطوة للدرب
الزمان وداك
هدير الرعدة والمطر
القبيل دقاك
تدق وتدق
الناس الجوه ما سامعاك
شنو الوداك؟
وكملت العمر طواف
ووين طشّش ود عينًا
قبيل شواف
تقيل شيلك ويا حليلك
عافت صخرتو الأكتاف
يااا حليلك وكت من مينا لمينا
مع الطير الغريب حوام
صبيًا قدلتك تعجب
وقدمك تركز الهدام
يا حليلك… فات العمر ما برجّاك
عام سلِّم مقاصدك عام
تمشي وبمشي البياض في الراس
تجِر ما بتلحق الأيام
شن جبرك على السهر
البلا غمضة؟
وشن ودّاك على الدرب
الوقد رمضة؟
لو قايل الصِّبا بشيلك
ماك حاسب المشيب أمضى
ده إنت في مراية الذات
ياك ذاتك
اكان تزعل واكان ترضى
مليح الفيك عمر تلفا
تلملم في الفضل منو
تلاقيلك بُويْت وحبيب
تعيش الباقي في حنو
جوازًا تاني بيهو تطش..
في نص البحر فنو
أخير جِنًّا تعرفو هنا
وسعيد البرضا بي جِنّو