أسوأ سودانيين✖️أسوأ حقبة➕أسوأ قادة✖️أسوأ مرحلة ✖️تاريخ السودان قديمه➗ حديثة

✍🏽خالد ضياء الدين

حقو الناس تتواضع وتعترف بالحقيقة المرة

1/ القاعدين يتقاتلوا ديل كان دع.م سريع أو جيش، أو مليشيات بأنواعها ومختلف مسمياتها، كلهم سودانيين حتى لو استعانوا بخبراء ومرتزقة أجانب أو دعمتهم دول أجنبية، وخلونا برضو نعترف إنه الحرب دي وقودها شباب السودان المفترض يبنوه ويعمروه مش يموتوا “اوانطة” في حرب عبثية وخسرانة زي ما سموها قادتها.

2/ الاغتصبوا الحرائر ونهبوا وشفشفوا وقتلوا العزّل، كان عسكريين أو مدنيين، ديل سودانيين.

3/ العقبو الناس على بيوتهم الفاضية، سرقوا الأثاث والملابس وعدة المطبخ ومارسوا أحقاد عجيبة؛ ديل سودانيين وأكثرهم نساء (بكل أسف) وبكل كل أسف فيهم جيران وأقارب وناس أمنوهم وخانوا الأمانة!

4/ السرقوا السيارات وشلعوها وخلوها مجدعة في الشوارع، والسرقوا المصانع والمستشفيات وكيبولات الكهرباء والنحاس، بلا أدنى شك هم سودانيين.

5/ الداعمين للموت وبفرحوا لمن يحصل وبستمتعوا بمناظر الجثث المجدعة والمتحللة، وتلقاهم بكوركو (بلوهم أو أجغموهم) كان من هنا أو من هناك، ديل برضو سودانيين.

6/ السايقين خطاب الكراهية والعنصرية والجهوية، والناس الشغالين بالفارغة، ديل سودانيين.

7/ النقلوا حكومتهم لبورتسودان والعملوا حكومة في نيالا، الاتنين سودانيين.

10/ الغلوا أسعار السلع الأساسية وما رحموا السودانيين، والرفعوا أسعار الإيجارات واستغلوا الظروف الصعبة وصعبوها زيادة حتى فاتت حد الاحتمال ديل سودانيين.

11/ الهدوا العمارات والبيوت، وكسروا الجسور بالطيران والمدفعية وزرعوا الألغام في الشوارع، وحرقوا الناس في القرى والفرقان وفي الأسواق، والبسببهم الناس أكلت صفق الشجر، والأطفال ماتوا بالجوع، ديل سودانيين.

12/ الضبحوا بعض وسحلوا وقتلو الأسرى، وشردوا مدن كاملة ديل سودانيين

13/ الهجروا الناس وخلوهم نازحين جيعانين مرضانين ذليلين، سودانيين

14/ ال…. وال…..وال…. وال…. بكل أسف سودانيين

ويبقى السؤال المحتاج إجابة هل نحن أصلًا كده، لاعندنا حرمة لي زول حي ولا ميت، لا بنحترم شيبة، لا عندنا شرف خصومة ولا إحساس ببعض؟

هل خلاص نختم على كده ونقول ياها دي حقيقتنا وياهم ديل انحنا، أحسن ننفصل، كل زول يشيل كومو ويمشي؟ ولا يا ترى ممكن من بين السجم والرماد الحاصل، ومن بين البغضاء والكراهية دي، من كوشة الرمم في سودان ما بعد انقلاب 25 أكتوبر وحرب 15 أبريل ممكن يطلع تاني السوداني الجوانا، الزول الطيب المسامح الكريم… ممكن؟ أكيد ممكن.

•#لا للحرب

•#نعم للسلام والمحبة

•#نعم للسودان الواحد

•# نعم للجيش المهني الواحد

•#لا لتعدد الجيوش والمليشيات

•#نعم للحكم المدني الديمقراطي

{معا لبناء جبهة الشعبية عريضة للديمقراطية والتغيير}