طشاش حلمك..

مدني النخلي
#ملف_ الهدف_ الثقافي

باقين عليك
فاردين شراع موج الحنين
قلبا علي وعدًا سراب..
صبرًا على الزاد الضنين..
يا هسه تنده لي.. أمس
عل الفرح يغشى الحزين
غصن المحنه الفرعو ني
شاباي عطيش والغيمه ري
نضما نجيض فوق البلد
فرضًا بقى ودينَا علي..
منو البفتح صباح البوح
يلملم صوتك المجروح
علي شرفة قماري تنوح
ويغني عديله للجايات؟
آسف. لو دونك مداك
شايف.. شظف عيشك ولا تخمة
رحيل زايف..
وقار صمت الكلام المر
ولا وعد الغنا الهايف
ردمت الهوة بيناتنا
وفي بدء الكلام يا دوب
أنا العريت قواميس الكلام
غنيت.. لا قبلك ولا بعدك
عشق يمخر عباب الهم
ويجاوبك بالقصيد النم
اسائلك وين؟ وكيف نتلم
إلى ما يلفظك حلمك
ولا لهث التعب ينجم
عشم فيك من عشم فيا
ويمازجنا إلتقاء الدم
ويا دوب الطشاش حلمك
أباريك والطريق ملمح
أداريك والسموم تلفح
أتاريك غيمه غيمه جات ترمح
إلى ما تنزحي وانزح؟
نقوم من ضو
يفج المشهد الزاهي سكون الكون
ويطل باهي..
يلاقي الشارع الفارع
ناسو الفي الحياه تصارع
تزيد الهوه بيناتنا
ولا عاد الرصيف ضاراي
ولا شقشق صباح مرساك
وطلَ على الخلق ناداي
ندهتك.. هل غشاك الطل؟
جفاف زهر الأمل ينبل
عذرتك لو يساورك شك
إذا انسدت مداخل الحل
متى انهزمت بشاراتك
وإيقاع الزمن اختل
علي لوحة شروق الفال
يزف وردك صباح الطل
علي شرفة قماري تنوح
نغني عديله للجايات..
1995