حجر حجرجر حجارة لا.. تبيض تكاكي جدادة لا

✍🏽خالد ضياء الدين

حجر راديو:–

لو عندك 5 حجارة بطارية وعندك راديو بشتغل بحجرين وقمت ركبت الحجرين وتاني طلعتهم وركبت حجرين تانيات وتاني طلعتهم وشلت حجر ختيتو مع الحجر الخامس وختيتهم في الراديو، علما بانه ال 5 حجارة مقاس واحد وشحنة واحدة، هل دا معناها إنك عملت تغيير في الراديو؟

هل حا تزيد من فعالية وصوت الراديو؟

هل الإحلال والإبدال دا بسمعك إذاعات جديدة؟

لمن تكون حجارة البطارية من نفس المصنع ونفس المقاس أي واحد فيهم بشتغل بنفس كفاءة التاني، لذلك قصة تشيل دا وتخت داك ماعندها معنى.

لمن تشيل إتنين من حجارة البطارية وتقول ليهم انتو معاش

وترفع حجرين غيرهم وتختهم في نفس المحل وتخلي معاك واحد احتياطي، هل مفروض نحن نفرح بالتغيير الانت عملته في حجار البطارية؟

على أي حال خليك انت في البتعمل فيه، أهو نحن قاعدين وانت قاعد، وكل ما عليت صوت الراديو بتاعك بتضعف حجارة بطاريتك لحدي ما تنتهي، في اللحظة ديك أوعاك تجيب وصلتك وتقول لينا عليكم الله وصلوها لي معاكم في كهربتكم… بس

(العايز يفهم يفهم والماعايز خليهو يعلي الصوت..)

حجر ريموت:–

صورة جنابو عشة الجبلية ماعندها علاقة بالعملية..

حجر ساعة:–

انتو البوزع هدوم الجيش للقونات دا منو؟!