ديني ودينك ودينهم ما واحد؟

✍🏽 خالد ضياء الدين

دينك وديني ما واحد؟ الخلى دينك يسب ديني جاحد، والخلاني أبيع خيلاني حاسد، الخلى سكينك تحز راسي ما دين، والخلاني أقول عنك كافر ما دين. والفرقنا ملل وقبايل، ألوان زرقة وعرب، صحراء وغابة، نيل وسواقي، جبال في كرري وجبال في التاكا… دا ما دين.

ديل ناس كذابين… أفاكين، ديل دجالين. الدين محبة، وحبة حبة الناس تحب الناس، الفي تقلي والفي كاس… معقول يا ناس؟! الدين موت؟ ناس تكبّر وتنتشي، تنهب ما تختشي، تقلع كل شي… دا ما دين، ولا هم مسلمين.

الدين طيبة، كلمة زي نسمة، الدين صدقة، وجار يأمن جارو. الدين فرقة؟! تفجها للآخر؟! الدين ما سيف ودرقة، الدين كورية مرقة لذيذة تشبع جائع، الدين عيشة وطرقة، كباية شاي ومديدة تتمد بالحيطة، الدين ما تكبير في الفاضي ولا جوطة.

الدين حرمة دم، وعشم في الخوة، الدين يا أبو مروة، الدين عرض محروس، وبيت متروس، وغنماية مطلوقة للعايز يحلب، الدين ما مقلب. لو فاهم الدين غير… يبقى أخير نفرز دينا ونمشي بعيد، ليكم دين ولينا صباح العيد، ليكم رب في الدنيا الزايلة، ولينا إله ونبي.

الدين لمن يكورك أبوك يا ولد، يجوه تلاتة: أنا وود عمي وود الجيران. الدين لمّة حبان، وناس تبكيك أكتر من الإخوان، تفديك بروحها، ولو مرة داهم بيتك سيل… الجار يصرف موتك بي عن حوشو.

دينك وديني ما واحد؟! طيب ليه تقتلني؟ لأني كفرت؟ ولا سبيت الدين؟ لا محسوب خارج من الملة، ولا ارتديت… الإداك الحق مين؟ نختلف… مالو؟ ما مشكلة، بس ما نرفع سيف ونهدم بنيان.

نختلف في ساس يسوس، لكن أوعاك من حرب بسوس. أوعاك تتغش… تعمل كشة، تصوت بي قشة عين الدين… خليك أمين. إنت وأنا نختلف، لكن أيه ذنب الأطفال والناس الطيبين؟ ليه يطلعوا هايمين؟ ليه الجوع والمرض والذل والهانة؟ مش أحسن نتفاهم بالحسنى بدل الجبخانة؟

الروح ما سهلة، الله موصينا عليها، فكيف باسم الله نفنيها؟ اختلفنا… نختلف، ما مشكلة، المشكلة تطلع إنت المسلم وأنا الكافر، أو إنت الكافر وغيرك مسلم. هو اختلافنا في الدين ولا سياسة؟ لا إنت نبي ولا نحن صحابة، لا إنت وكيل في الأرض ولا نحن أسيادها.

النرجع لي الله، ونرمي سلاحنا… ترجع أفراحنا. لا بورتسودان ولا نيالا، لا أمل خداع ولا تأسيس على باطل. خلونا نقعد نتفاكر… كيف الناس ترجع زي أول، قبال ينخر في عضامنا السوس. خلونا نفكر كيف كل واحد يضغط على جرحو، ونتطايب، نتقالد، ونبكي ولادنا الراحوا… عشان يرتاحوا.

ياخي… ياخوانا… كفاية خلاص.