شاي بالقرفة.. ليمون بالنعناع

بقلم: خالد ضياء الدين
#آراء_حرة

• يجي يشرب ليمون بالنعناع، يتصور ويمشي..
  يقعد مع ست الشاي يشرب شاي، يتصور ويمشي..
  يقعد في مطعم ياكل فول بالجبنة، يتصور ويمشي!

• نحنا استفدنا شنو؟
  طلب الفول نقص، ولا بتاعت الشاي ناس المحلية خلوها في مكانها، ولا السكر سعره نقص؟

• المسؤول لمن ينزل الأسواق ما بكون محتاج يعمل هيلمانة و(شوو) لنفسه، بكون عايز يستكشف ويتخبر عشان يعايش أوضاع الجماهير. وبدل ما سيد المطعم يحلف عليه ما يشيل منه حق الطلب، مفترض المسؤول يعرف قيمة طلب الفول دا الناس قادرة تدفعه، لأنه ما كل الناس عندها حرس خاص بدفع ليها من مال الدولة ولا عندها ميزانية مفتوحة، وبتاع المطعم ما بحلف ويقول للزبون العادي حق الطلب مدفوع.

• كباية الليمون بالنعناع دي 90% من الحايمين في السوق عطشانين وما قادرين يشربوها، وكباية الشاي في كرسي بالشارع بقت ترف عند كتير من الناس، من وين يجيبو حقها.

• طلعاتك ومرقاتك يا سيدي الأمانة ليك حاول تعكس مضامينها وفكرتها، انت بتطلع عشان تلمع نفسك ولا عشان الناس الراجياك تغير من حالهم؟ لو انت بتفكر بس في حالك وهم في حالهم كدا البلد ما بتمشي (ومبروم على مبروم ما بلف).. مش؟

• لما تطلع خت في بالك الناس الطيبة الملمومة حواليك، احتياجاتهم، مشاكلهم من أكل وشراب وعلاج وأمن، أسألهم عن أحوالهم، شيل معاك قروش اغمت ليهم، وجه المدراء التنفيذيين بتسهيل الحياة عليهم، اعزمهم معاك ليمون بالنعناع، معقول تشرب براك وأمة لا إله إلا الله تعاين فيك؟ احلف طلاق قول للناس الفطور الليلة علي.

• الناس تعبانة يا سيادتك، محتاجين حجم الرغيفة يكبر وينقص ثمنها، مش يصغر حجمهم ويكبر همهم. كمان علاج الملاريا لازم يكون معقول، عايزينك وانت الفي يدك القلم وكل السلطات تحت يدك تنقص سعر البنزين عشان المواصلات بقت غير محتملة، يا سيادتك المواصلات الداخلية بالشي الفلاني خليك من تقطع مسافات بعيدة.

• وكمان الناس الفرحانين بيك ديل محتاجين يتحركوا في أمان، أمس في الثورة الحارة 51 في واحد طلع من صلاة العشاء قتلوه عشان موبايل، نبطل الصلاة المغرب والعشاء في الجامع؟ يا سعادتك الشفشافة بقو يقالعوا الناس في حقها التقول شركاء معاهم، و9 طويلة في زيادة.

• ديل المحتاجين يستفيدوا من نزولك في الشارع مش العكس.

• نفسي أشوفك ما بتضحك لمن تحوم في الأسواق، نفسي أشوفك حزين لمن تشوف السوق تلات أرباعه مقفل والبيوت مكسرة ومنهوبة، نفسي أشوفك حزين على الناس البقت هياكل عظمية من نقص الغذاء والجوع. حبة حزن يا سعادتك بتخليك تفكر صاح، وبتدل على إنك طلعت عشان الناس مش عشان تثبت لناس معينين إنك مسيطر.

• سيطر لينا أول على الكهرباء والموية، سيطر على الأسعار والأمن، وبعداك اقدل وزور زياراتك، اطلع وانزل، اشرب ليمون بالنعناع أو حتى عصير مانجو إلى أن يقضي الله أمراً كان مفعولًا.