كراس في زمن الحرب

سهل الطيب
#ملف_الهدف_الثقافي

زوجتي معلمة أساس، يوم بتصحح في كراس بت في سنة خامسة .. بت مهذبة وجميلة وشاطرة جدًا..
قعدت تتأمل في كراس البت ومدى تميزها في الدروس .. بس الكراس مختلف شوية وكانو كل ورقة من كراس تاني وفي نص الكراس مافي دبوس لكنو مخيط خياطة جميلة جمعت الأوراق كلها مع بعض
.
زوجتي قعدت مع الطالبة وأصرت تعرف ليه كراسها مختلف عن باقي الكراسات وبعد ما التلميذة اطمأنت لي كلام زوجتي ردت ليها بمنتهى الخجل أنهم ما عندهم قدرة يشترو كراس جديد ف أخوانها وأخواتها الطلبة كل واحد مرق من كراسو كم صفحة وهي ذاتا مرقت صفحات من باقي الكراسات العندها وعملو الكراس دا بعداك أمها جمعت الورق كلو بالإبرة والخيط
.
زوجتي اتأثرت بالموضوع دا شديد وحكت لي الحكاية
.
أنا رغم إنيّ زول مجازف وبحاول قبل فترة من بداية العام الدراسي انيّ أجمع كل مايخص عيالي من شنط وكراسات وأدوات مدرسية لكن حبيت أكتر فكرة كراس البت دي .. فكرة مجنونة ورهيبة وبتوريك الترابط اللذيذ في الأسرة دي .. اتمنيت أكون من أسرة تعمل كراس بالطريقة دي أكتر من فكرة أجمع كل مايخص العام الدراسي قبل فترة من بداية السنة
.
إذا
الحرب مصيرها تنتهي
ممكن نعود لحياتنا العادية
ممكن نعيش فترة بتاعت رخاء كمان
لكن
هل استثمرت فترة الحرب في إنك تقدم خدمة لي زول،
أي خدمة إن شاءالله تلقى جارتك شايلة جردل تفتش لي موية شراب وتشيل ليها مسافة شارعين
لما عزت الأشياء هل شاركت بالشي العندك
لما حلت الأزمات هل شديت ضراعك مع الناس
.
لو ماعملت كده يبقى فوت موسم عظيم من مواسم العمل الإنساني النبيل
برضو مافاتت عليك حاجة .. ممكن تساعد الآن .. حاول اتفقد الجمبك حاول تقدم العون حاول أعمل اي حاجة لغيرك.
.
أنا صاح بوفر حقيبة مدرسية كاملة خلال شهور، لكن يعجبني أكتر فكرة الكراس الساهمت فيهو الأسرة كلها.