قارب الأحلام

حنان شاهين
شاعرة من مصر

بلاها شعر يا شعرا
عملنا ايه
مفيش ولا مرة مد ايديه
وشال مدفع
مفيش مرة حدف نبلة في عين محتل
مفيش مرة كدا استجدع
وخبانا في بيت من ضمن أبياته
من الحراس
كبيره يوسع السكة في مجرى الدمع
بلاها شعر وقصايد
لا ليها ايدين ولا رجلين
كبيرها لسان نفضفض بيه
كلام موزون لكنه كلام
نقوله لبعض و نروح
هنشتم حبة في الدنيا اللي سحلانا
هنعتب حبة ع البلد اللي
رميانا في بلاد الخلق
بندخل شق أكل العيش
تتوهنا شقوق أضيق
بتوصل كتير لمفيش
بلاها شعر يا شعرا
عملنا لنا أيه
في قارب لم أولادنا
بأحلامهم و أحمالهم
وهيلة بيلة قبض منهم
وسيبهم في وسط البحر
ومد دراعه عالآخر
وقال عوموا
إيطاليا هناك
شبابنا الورد
كان فيهم ولد شاعر
تمللي يروح بلاد الحلم
في قصايده اللي جات وياه من الرحلة
حروف دايبة في مية وملح
شبابنا الورد كان فيهم ولد حيلة
وكان هو أمل عيلة
وكان فيهم شباب ياما
شداد مستنظرين بكرة
شبابنا الورد حطوهم
مجرد سطر في النشرة
ونسوا يحطوا شريط أسود
على الشاشة
لكن ما نسوش يذيعوا الماتش
بلاها شعر يا شعرا
مبيأكلش أبدا عيش
يموت الشاعر الملهم
فقير دقة
ولعيب الكرة بيعيش