سكويلر وزير إعلام المزرعة

مهادن الزعيم
#ملف_الهدف_الثقافي في رواية مزرعة الحيوان لجورج اوريل تطابق غريب مع واقعنا في السودان لدرجة تخليك تضحك براك … الرواية بتتكلم عن مزرعة فيها عدد من الحيوانات وصاحب المزرعة ظالم ف قررو يثورو عليهو ويديرو حياتهم براهم وفعلًا نجحوا بقيادة اتنين من الحيوانات (واحد زكي اسمه سنوبل والتاني ضخم اسمه نابليون) أها بعد يومين المزرعة اتعرضت لهجوم لكن سنوبل كان مستعد وقدر يصد الهجوم مع باقي الحيوانات وأصيب في كتفه برصاصة وفي اللحظة دي نابليون كان لابد في حتة آمنة …
بعد الانتصار ختو سبعة قواعد تحكم حياتهم (كلنا متساوين وما من حق حيوان يقتل التاني ومافي حيوان يلبس هدوم ولاينوم في سرير ولايسكر والإنسان عدو والحيوان صديق) وكتبوها في لافتة وعلقوها في نص المزرعة …
بعده اقترح سنوبل يعملو طاحونة هوائية عشان ح توفر ليهم الكهرباء والموية وتوفر جهد للحيونات ونابيلون كان رافض الفكرة تمامًا وبحرش الماعز يقاطعن كلام سنوبل أها لمن لقى الموضوع ماشي ماشي والحيوانات فرحانة بيهو جاب كلاب وهاجم بيها سنوبل وأجبره على الهروب ونصب نفسه زعيم تحت حماية الكلاب …..
هنا برز دور الخنزير سكويلر (وزير إعلام المزرعة) جمع الحيوانات وقال ليهم من الليلة تاني مافي اجتماعات ونقاش … الحمد لله نابيلون وافق يكون زعيمكم ويفكر نيابة عنكم وانتو تنفذوا بس …
نابيلون قرر يسكن في بيت صاحب المزرعة وينوم في السرير ويسكر لط وبقى يقتل أي حيوان مخالف ليهو… طبعًا الحيوانات اعترضت وقالت انو الزعيم خالف الوصايا ف لماهم سكويلر وقال ليهم (أمشوا أقروا الوصايا بتقول شنو حتى تعترضوا … الوصاية قالت م تقتل (بدون سبب) وانتو حفظتو النص الأول بس كذلك قالت م تسكر لحدي (الإفراط ) وماتنوم في سرير فيهو (ملايات) .. وفعلًا لمن مشوا قروها في اللافتة لقوها مكتوبة كدا لأنو سكويلر أضاف الزيادات دي بالليل عشان يبرر أفعال الزعيم المخالفة للقواعد والغريبة أقنع الحيوانات إنها بتتخيل بس والوصايا أصلًا كدا مافيها أي تعديل …
بعدها بقى سكويلر ينسب كل المصايب البتحصل من سرقة محاصيل وبيض وتقاوي لي سنوبل (يعني بعلق فشلهم في الإدارة كلو في سنوبل) وطبعًا القائد أصدر حكم بإعدام سنوبل …سكويلر قال للحيوانات سنوبل دا أصلًا خائن من زمان وحتى مشاركتو في معركة الزريبة كان بقاتل بهناك مع البشر ضد الحيوانات لكن انتو نسيتو بس وحتى فكرة الطاحونة م حقتو حقت نابيلون عشان كدا من بكرة ح نبني الطاحونة ……….
بدو في بناء الطاحونة ولمن خلاص قربت تكمل اتفاجأو ذات صباح بأنها اتهدمت وهنا طوالي صرح القائد بانو هدما سنوبل وبعدها انضم للمزرعة المجاورة عشان يهاجمنا منها وطوالي قبضو كم حيوان من طرف وأعدموهم بتهمة التعاون مع سنوبل …
المزرعة اتعرض لهجوم واتصدت الحيوانات للهجوم (عدا القائد كان لابد في البيت هو وسكويلر) ودافعت الحيوانات عن المزرعة لكن اتهزموا وتمت سرقة كل البيض والحليب والأعلاف وهدمو الطاحونة الحظائر وأصابوا كل الحيوانات بجروح خطيرة ,,, أها جاهم اسكويلر بعد المعركة انتهت وضرب كم طلقة في الهواء وقال ليهم انتو زعلانين مالكم ..؟ نحن انتصرنا … انتو م عارفين حجم المؤامرة الكانت علينا من المزراع المجاورة قدر شنو …؟ انتو عارفين انو سنوبل هو الكان قائد الهجوم …؟ يلا في حيوانات هنا معانا هم طابور خامس شغالين لحساب سنوبل ولازم ننضف صفوفنا أول (وفعلًا قامت الكلاب بتمزيق عدد من الحيوانات بتهمة العمالة) …
أسقطوا الواقع دا على حياتنا وشوف فيها كم طاغية زي نابيلون وكم خنزير بزور الحقائق ذي سنوبل وكم حيوان بصدق التزييف دا بكل سهولة بدون م يكلف نفسه عنا البحث عن المعلومة الحقيقية … عجبي

الله غالب