صوت عتاب

مهادن الزعيم

إلى السادة شعراء الحرب … يجدكم بخير

أنا شايف في تقصير واضح منكم في تحويل كلمات القائد المؤثرة إلى أغاني يلهج بيها جميع أبناء الشعب … م معقولة قبل أسبوع يقول (المجد للبنادق) ولسة مافيكم واحد كمل عليها ولحنا وأداها لي قونة … أعملوها إن شاء الله بلحن الزنق المهم توصل للشعب ويرددا ويحفظا وممكن تستعينو بالشيخ المجاهد أمين حسن عمر لأنو عندو نص قريب من الحاجة دي بقول فيهو (سيعود أخوان البنادق والخنادق والحروب)
المهم لو لحنتوها زنق أو دستور دوها لي الأخت الفاضلة (أم فلجة صاحبة أغنية نادو لي صرفة) ولو سيرة أدوها صاروخ الغناء لي ميادة قمر الدين، التي خلدت مقولة (بل بس) بأغنيتها الرائعة (بل بل بل غيرو مافي حل) ولو بإيقاع المارش العسكري أدوها لي الأخت الفاضلة والفنانة العظيمة صاحبة الروائع الخالدة (جوية يامطر الحصو ودخلوها بالباب الوراء) ندى القلعة لأنو مافي أنسب منها عشان تخلد أقوال الكاهن في لحن (لو ماعايزنها بصوت فنانة ممكن تستعينو بالود حمو بتاع سنعوووووود بالفجر الجدييييييد) …

والسلام ختام