مجرد_خيال

مهادن الزعيم

ي مؤمن لو السادة العساكر والمتعسكرين الجدد (بوكو) صحو في يوم الصباح ولقو البلد دي مافيها ولامواطن واحد (طبعا رأسهم ضرب… كيف يعني مافي مواطن ملكي …؟! لالالا كدا الموضوع دا مابمشي لقدام) … طلعو الشارع لقو زول لابس ملكي سايق توسان … فرحو فرح شديد ووقفوهو طوالي (أنزل ي مواطن … أنزل ياملكي) السواق ركن العربية بالجمبة ونزل زعلان وعروقو عايزة تطق من الغضب وقال (مواطن منو يازول … انت جنيت ولا شنو …؟! أنا تقول لي ملكي ؟! انت عارف التوسان دي أنا جبتها من وين ..؟! التوسان دي حقت دعامي وأنا قلعتها منو في حرب الكرامة الأولى لو انت متذكر .. قوم لف شوف شغلتك وين قال مواطن قال أعوذ بالله ياخ) وطبعا طلع بطاقة انو تابع لحركة مسلحة حاربت مع الجيش دفاعًا عن الأرض والعرض والوطن ….
مشو تاني لقو زول فاتح كشك عصير قالو بسسسس دا مواطن … مشو شربو عصير ولمن جو طالعين قالو ليهو (انت ي مواطن عندك ترخيص للكشك دا ولا شغال ساي) طبعا الحنك دا عشان مايدفعوا حق العصير وهنا انتفض صاحب الكشك ورفع شوال السكر القاعد في طرف الكشك وطلع من تحتو كلاش وبطاقة بتثبت انو م مواطن ساي وانو والحمد لله ربنا فتح بصيرتو واستنفر واتعسكر في حرب الكرامة الجزء التاني بعدما كان مخدوع من القحاتة عملاء السفارات ….
مشو جمبة قاعدين فيها مجموعة كبيرة من الناس بحضرو في مباراة بين أرسنال وانترميلان في نهائي الأبطال أها واحد من ناس برشلونة قال إن شاء الله يفوز الأرسنال عشان أكل مدريد رايح جاي … هنا نط ليهو واحد مدريدي وقال ليهو (اوتاروووو اوتاروووو) والمشكلة دورت نط واحد طلع بطاقة وقال ثابت ي مواطنين معاكم نظامي تابع كيكلاب الجمبو قال أنا مورال البهناك هتف (ثورة اتولدت في الظلااااام) عرفوهو كتائب والورا بجا حديد وشغال بحمر لي واحد أورطة شرقية أما المعلم الببيع الحاجات للجماعة طلع تابع لأولاد قمري … كلهم عاينو في بتاع النادي على أساس انو مواطن فابتسم لهم على استحياء ومكر رافعًا أصبعه ومرددًا (الله أكبرررر الله أكبر) ويدو التانية غامت بيها إيراد المكان … قبلو على بتاع القهوة قال ليهم أنا إسناد مدني يازول عاينو في زول طرف هنااااك قاعد ساكت وحزين وزعلان من الوضع الحاصل وبردد في سرو (لا حول ولا قوة إلا بالله) قالو بسسسس دا مواطن مشو عليهو اثبت فوق ي مواطن … عاين ليهم بنظرة غضب وقال ليهم (أنا بوليس) … ردو بصوت واحد بسسس معناها مواطن هنا انتفض زول كان قاعد سااااكت من الأول والحال م عاجبو وقال ليهم (دا نظامي ي أغبياء وانتو مجرد ملايش … أي دولة بتقوم أمنيًا على تلاتة جيش وشرطة وجهاز … أها انتو شنو في ديل ؟! وبعدين انتو من قبيل بتنبزوا في المواطن كأنو حاجة كعبة ..؟! والله انتو م عارفين يعني شنو مواطن … نحن يوم اتخرجنا من الكلية الحربية حلفا قسم على حماية المواطن ولو ضحينا بأرواحنا … هسه انتو ي عساكر بوكو شايفين المواطن درجة تانية …. لا حول ولا قوة إلا بالله) ….
أها الناس الفوق قالو الوضع دا كدا مابمشي لقدام … كيف يعني مافي مواطن ولا في زول قبلان يبقى مواطن وأي زول عندو سلاح وبطاقة وتابع لجهة رسمية أو غير رسمية ..؟! ف أصدرو قرار انو اي زول من الناس اللسة قاعدين واتعسكر بعد 15 أبريل ينزل لدرجة مواطن ويتم تطبيق القانون دا بالقوة الجبرية … طبعا الكلام دا زعل ناس كتار شديد وطوالي صاحبنا عكشيب طلع في لايف شديد اللهجة تم بثه في كل حدود دولته من الفيسبوك لحدي اليوتيوب والكلوب هاوس وقال (القرار دا تم تفصيله بالمقاس لنزع السلاح عن النهريين) واعتذر لأنو مابقدر يكمل اللايف لأنو بكرة عندو دوام وناس برة مابجاملو في التأخير وطلب منهم مناهضة القرار بكل السبل ….
هاجت الدنيا واقترح عليهم واحد من شباب الكتائب إنهم يطلعوا مظاهرات في قلب العاصمة … وافق أغلبية أعضاء الحركات بشرط تكون مظاهرة (بالسلاح) وحبايبنا يهتفو (صابرين صابرين صابرين) وطبعا بدل الصفقة في الكولن حاتكون كم طلقة سلاح من أم ،16 أو كلاش (تتل تل تل) ولازم يعمل الحركة دي واحد من جماعة (الزخيرة تراب) والشغلانة جاطت لحدي م واحد منهم مسك المايك وطلع في حتة عالية وقال ح نسلم القيادة مطالبات وهي يجيبو أولاد معمر موسى لأنو حتى اسمهم في الجامعات مواطنين) وافقت القيادة كحل مؤقت لمن مشو ليهم لقو معمر شال باوراتو واتخارج …. وطبعا طلع خبير استراتيجي في قناة الجزيرة قال (القحاتة العملاء سرقوا المواطنين كلهم وطلعوهم برة بواسطة الدويلة إياها ونحن لن نسكت وحانشتكي للأمم المتحدة) ………
في الطرف التاني الوضع اتأزم شديد … كيف يعني مافي مواطن يتهموهو بانو فلنقاي … البتقبضو جت يطلع مجلس انتقالي ولا تجمع قوى التحرير ولا تحالف سوداني ولا تبع عبد الواحد ولا شجعان كردفان أو تمازج … وطبعا الموضوع قلب قبلي شديد وأصبحت الحدود بين الحواكير مشددة الحراسة أكتر من الحدود الأمريكية المكسيكية أها قالوا خلاص ننزل (أم باغة وناس حركة رؤية) يبقوا مواطنين لكن القرار دا م يطلع للعلن إلا بعد نصادر كل المواتر عشان ناس أم باغة م يعملو لينا بلبلة … يوم التنفيذ صدر القرار فهب كل ام باغة إلى موتره ولم يجده ودورت مشكلة كبيرة بالذخيرة الحية (طبعا ناس رؤية تلاشو فجأة زي ما ظهروا) لكن عزيمة أم باغة غلبت كل شيء فحمل كل منهم باغة موية على كتفه الشمال وسلاحه على الكتف اليمين واتحركوا بكرعيهم خارج المدن وعملوا مناطق محررة في الصحراء وقالو الراجل خلي بجي بهناك …. أما بشارة علي فكان بفتش في فيديوهات المعركة الحصلت ضد أم باغة ورؤية عشان يعاين في لون الناس الحصل ضدهم انتهاك حتى بعد كدا يستنكر أو يعمل رايح ولمن لقى الشغلة جايطة مسح صفحتو في الفيس وقفل تلفونو وقال أنوم بدري عشان عندي دوام لأنو الخواجات ديل مابهظروا في التأخير …
طبعا الحرب وقفت لأنو مافي حكامة تزغرد وتشكر ولا في دلوكة يقول بل بس ولقوا روحهم كلهم في مباراة من غير جمهور ولحكاية خسرانة
(بصراحة الحفلة كان م فيها بنات سمحات يزغردن لينا ولابننجلد فيها خلي الحرب) … السرد مجرد خيال … الله ثم الوطن من وراء القصد…. عجبي

الله غالب