عبدالعزيز شين
الحلقة 2 :
ثاني الشكوك حول علاقة الأكل بالسمنة أو النحافة.. هو احتمالية أن تلعب الوراتة…أو بعض الهرمونات دورًا كبيرًا في النحافة أو السمنة…رغم توفر عامل الأكل بشراهة
سواء كان ذلك من عينة الأكل بنظام الطحن أو الأكل بنظام الهرس وهو نظام خاص بمتناولي الكميات الوفيرة من الأكل ..وكمثال لذلك الزول البمشي محل أقاشي ويقول للمعلم :مبدئيا كده أعمل لي عشرين سيخة
وطبعا في ناس نحاف جدًا..وممكن ياكلو أكل السوسة والعافية المدسوسة ولا يظهر ذلك على وزنهم أبدًا والزول ده لو ختو ليهو ما لذ وطاب من الطعام..ممكن ياكل ما لا يقل عن خمسة كيلو من الأكل ولو وزنتو بعد الأكل مباشرة ..بتلقاهو بنفس الوزن حقو قبل الأكل ..الأكل بمشي وين ما عارف وفي ناس عكسهم تمامًا …أوزانهم كبيرة وزائدة وحتى لو عمل حسابو في الأكل وأكل كميات بسيطة..وزنو بيزيد وقتي يعني لو أكل ليهو قطعة لحمة وزيتونة وقطعة جبنة..ومعاها كيكة ..لما توزنو بعد الأكل مباشرة بتلقاهو زايد خمسة كيلو
وأذكر أن أحد أقربائي كان نحيفًا جدًا…حتى لقبه الناس بابو التعب أذكر أنه حظى بإقامة في أحد دول الخليج..وتوقع الناس أن تفعل الكبسة وموية الملح والفواكه والراحات بجسمه الأفاعيل ولكنه عاد في الإجازة بنفس حجمه القديم مما أثار موجة من الدهشة بين الأهل …إلا أن أحد ظرفاء العائلة طمأن الناس قائلًا: يا جماعة الزول ده وزنو زاد جرام واحد على الرغم من أن شنطته التي سافر بها.. زاد وزنها (وهي فارغة) كيلو كامل بسبب بخار الكبسة..ورطوبة المكيفات.