سارة منوفلي
#ملف_الهدف_الثقافي
قدرنا كده
قدرنا نصارع الأمواج
نقيف في وش
رياح الهم
كما المعبد
قدرنا نشيل رسالة خير
أمانة على الوطن…والغير
ونجري بيه
قدر ما نقول وصلنا خلاص
نشوفه سراب
بدت تبعد
ولا تحرد
كتير أحلامنا
خانتنا
قبل نحسب
حساب الدين
تقوم تجرد
وكم في سكة المشوار
اتوكلنا فوق كف القدر
مسرب
على ضهر الحمول نسرج
بيوتنا وكل فضل عندك
عليك اسم الله
يا (عبدالله) كان.تحرد
أكان وطنك بقى سجين
وكان العالم المطلوق
على قيدك …يخت قيدين
أكان من الوجع كالوك
واكتالوك باسم الدين
أنحنا الثورة والتاريخ
وفخرا من قديم مرتع
ولا بنحرد
هو حقنا صح
وسام الحق.. نصر ونلح
ومن حقو العلينا..نكح
وبي حقي العليهو بصح
ونحنا أحق من الجونا
تحت ليل والكلاب تنبح
نسيب المن عروقنا روي
وفي خشمك تراب أكتح
أخير من قول عوج يجرح
وأخير أنطمة يا بت أمي
وكتين البلد مقلوبة
وكأسات العرق مشروبة
وغراب البين دليل
قدااام
على غصنا على اللالوبة
أخير أنطمة يا بت أمي
كان تديني شربة ألمي
من ايديك
تسندي قفايا
تسدي وراي
أثر خطواتي جمب بابك
قبل أوصل أدق بابك
يكون شوفك فتح جابك
ولا بحرد
بجيك قاصدك عديل مو
صدفة
بجيك طالب حقوق الدم
أواصل في الأصل انساب
وما عرفة
بجيك رغم البقيف قدامنا
لا بعرف غبن لا خوف
سوى إنك
حدود قلب الوطن كان
دقة كان رفة
ولا بنحرد
ولا نفتر
دي أحلامنا
أحلام البشيلو الشيلة
وقتين السند ميل
كدي التمنعنا أحلامنا
أكان تقدر
إلى الأخ والصديق العزيز باشمهندس Eltahir Abdellatif Hassan الذي قرر أن يحرد ، وكل الحردانين .