*المشروع الصهيوني أصبح عبء في ضهر أمريكا…*

*قلم: ماجد الغوث*

الحكاية ما حكاية جملة قالها ترامب في مقابلة وعدّت، ولا حكاية حزب خسر كم كرسي في الكونغرس وخلاص، الحكاية أكبر من كدا بكتير، الحكاية تحول كبير في العلاقة بين أمريكا وإسرائيل، وانكشاف حقيقة كانت مدسوسة سنين طويلة، إنو المشروع الصهيوني بعد ما كان ورقة رابحة بتلعب بيها أمريكا في الانتخابات، بقى عبء تقيل على ضهرها، وورقة خاسرة ما بتجيب غير النفور والخسارة، فالزول القال بنفسو إنو في نفور كبير بصورة لا تصدق من إسرائيل، دا نفس الزول النقل السفارة للقدس، واعترف بسيادة الاحتلال على الجولان، وفتح خزائن أمريكا لنتنياهو على مصراعيها، لحدي ما بقى الفرق بين البيت الأبيض ومكتب نتنياهو أصغر من الفرق بين الرئيس وشعبو، وهو ما قال الكلام دا لأنو فجأة بقى مع فلسطين، ولا لأنو اعتذر عن أطفال غزة الماتوا بالقنابل الأمريكية، ولا لأنو ضميرو صحا على أنقاض البيوت، لا، هو كان بيعاين لحاجة تانية خالص، كان بيعاين للكراسي الخسرها حزبو، وللأصوات البقت ما بتجي لمن ينادي، وللجمهور الكان بيصفق ليهو لمن قال أمريكا أولا، وبعدين اكتشف إنو الراجل دا دخل أمريكا في حرب بتخدم حسابات نتنياهو، ودي هي الخلاصة الأولى بلغة العلم والسياسة، إنو السياسة الأمريكية ما بتحركها الضمير بل المصلحة، وما بتغيرها الأخلاق بل الأرقام، وما بتعترف بالجرائم بل بالهزائم، وترامب الزول البيعرف لغة السوق أكتر من لغة الأخلاق، قرا النفور في لغة الأرقام، في صناديق الاقتراع، في استطلاعات الرأي، في خسارة المقاعد، في تراجع التبرعات، في انقسام قاعدتو، فقال القالو ما لأنو اكتشف الحقيقة بل لأنو اكتشف الخسارة، وما لأنو حب الفلسطينيين بل لأنو كره الخسارة، وما لأنو داير العدالة بل لأنو داير البقاء، والمعنى التاني إنو نتنياهو ما كان قاعد في الغرفة مع ترامب، لكنو كان قاعد في الإجابة، لأنو هو المهندس الحقيقي للهزيمة، فقبل اللحظة دي بشهور كان داخل ومارق من البيت الأبيض شايل خرائطو وحروبو الما بتنتهي، وما كان محتاج يقنع ترامب بحب إسرائيل، كان محتاج يقنعو إنو الحرب الدايرها حتصنع منو بطل تاريخي، وكان عارف ياتو باب يطرق، إيران، مفاعلات نووية، وصواريخ بعيدة المدى، وطيارات أمريكية بتضرب محل ما بتصل طيارات غيرها، وحكاية عن نصر خاطف يخلي ترامب فوق كل الرؤساء القبلو، ويديهو صورة الزول الأنقذ أمريكا والعالم من خطر كبير، ودا كان الإغراء اللقى طريقو لخيال رئيس ما بحب زول يشاركو البطولة، نتنياهو داير حرب أمريكية تحسم ليهو الما قدر يحسمو براهو، وترامب داير حرب تديهو المجد الما ادتهو ليهو سنين الحكم، ودخلت أمريكا الحرب، لكن المشهد الأخير ما جا زي ما تخيلو الراجلين، الجماهير الأمريكية ما طلعت الشوارع شايلة صور ترامب المنتصر، والحرب ما بقت رصيد انتخابي لجمهورييه، والأسئلة بدت تطلع من جوة المعسكر الوصلو للبيت الأبيض، الحرب دي حقت منو، منو القرر دخولها، وليه أمريكا تتحمل نتائج مغامرة بتخدم أهداف نتنياهو، كان ترامب قايل الحرب على إيران حتكون استعراض سريع، ضربة تنتهي في ليلة، وصورة تنتشر في الصباح، ونصر يعلن في المساء، لكن الحرب كشفت حقيقتها، إنها ما نزهة، وأن العالم ما بيدار بمنشور على منصة، وأن الجمهور الأمريكي الزهج من الحروب ما داير حرب جديدة عشان نتنياهو ولا عشان زول تاني، والجمهور الكان بيصفق لترامب لمن قال أمريكا أولا اكتشف إنو أمريكا بقت أخيرا، وإنو قروش الأمريكيين ماشة لتل أبيب، وسمعة أمريكا بتتدمر عشان مجرم حرب مطلوب للعدالة، وهنا بدا النفور، ما نفور أخلاقي بس، بل نفور سياسي واقتصادي وشعبي، نفور من دولة احتلال بقت عبء على حليفها، ونفور من رئيس حكومة احتلال بقى يجر حليفو لحروب ما دايرها، ونفور من مشروع صهيوني بقى يهدد مصالح أمريكا نفسها، والمعنى التالت إنو النفور دا ما حدث أمريكي داخلي بس، بل مؤشر على تحول عالمي في الوعي، فالشعوب في أمريكا وأوروبا وكل العالم بدت تشوف إسرائيل على حقيقتها، دولة احتلال، دولة فصل عنصري، دولة إبادة، دولة بتقتل الأطفال والنساء والصحفيين والأطباء، دولة بتدمر المستشفيات والمدارس والمساجد والكنائس، دولة ما بتحترم قانون ولا أخلاق ولا إنسانية، والوعي الجديد دا ما جا من الإعلام الرسمي، بل من الصورة الحية، من التلفون، من الطفل البيصرخ تحت الأنقاض، من الأم الشايلة جثة ولدها، من الدكتور البيبكي في المستشفى، من الصحفي البيستشهد وهو بينقل الحقيقة، والمعنى الرابع هو السؤال البفرض نفسو بعد كل دا، منو لسه بيصفق في رام الله، منو لسه بيصفق وواشنطن نفسها بدت تتململ، منو لسه بيراهن على ترامب بعد ما ترامب خسر جمهوراً، منو لسه بيراهن على نتنياهو بعد ما نتنياهو خسر حليفو، منو لسه قايل الحل بيجي من البيت الأبيض والبيت الأبيض نفسو بيتهاوى، منو لسه قايل التنسيق الأمني حماية، والمفاوضات العبثية طريق، وانتظار الضوء الأخضر من أمريكا هو السياسة، بينما الشعب الفلسطيني بيدفع الثمن في غزة والضفة والقدس، والسلطة في رام الله لسه بتصفق، بتصفق لخطة ترامب، وبتصفق لوعود الإدارة الأمريكية، وبتصفق لمشاريع اليوم التالي، وبتصفق لأي حاجة بتجي من واشنطن، حتى لو كانت ضد الشعب، حتى لو كانت ضد المقاومة، حتى لو كانت ضد فلسطين نفسها، والبيصفقوا في رام الله لسه ما فهموا إنو زمن التصفيق انتهى، وإنو زمن الرهان على أمريكا انتهى، وإنو زمن انتظار الحل من برة انتهى، وإنو الحل الوحيد جوة، في وحدة الشعب، في المقاومة، في الجبهة الشعبية الديمقراطية الواسعة، في بناء الدولة ما في انتظار دولة، في فرض الحقائق ما في انتظار الوعود، فترامب خسر جمهوراً لأنو خدم نتنياهو، ونتنياهو حيخسر حليفو لأنو جر أمريكا لحرب ما دايرها، والبيصفق في رام الله حيخسر شعبو لأنو خدم ترامب ونتنياهو مع بعض، والتاريخ ما بيرحم البيصفق للجلاد والضحية بتنزف، والشعب الفلسطيني الصمد في غزة، وقاوم في الضفة، وثبت في القدس، ما حيغفر للصفق في رام الله، وما حينسى الباع الدم بالتصفيق، والمعنى الخامس والأخير إنو المستقبل ما بيصنعو البيصفق، بل البيقاتل والبيقاوم، وما بيصنعو البينتظر، بل البيبادر، وما بيصنعو البيراهن على برة، بل البيراهن على جوة، وإنو الدولة الفلسطينية الحقيقية ما حتجي من خطة أمريكية، ولا من وعد إسرائيلي، ولا من مؤتمر دولي، بل من إرادة الشعب، ومن وحدة القوى الديمقراطية، ومن جبهة شعبية واسعة بتخلي فلسطين فوق كل الحسابات، والمقاومة فوق كل المساومات، والكرامة فوق كل التنسيقات.