يوميات داين

✍🏽خالد ضياء الدين

قمت من الصباح لفيت عمتي وقلت أطلع بدري ألحق تاج السر قبال يطلع، لي شهرين ما لامي فيه، كل ما أدق الباب وأسأل يقولوا لي مافي، ما رجع، مسافر….

تاج السر قبال 3 شهور جاني في الدكان وشو التقول ممسح بي رماد، أغبااااش وحالته صعبة.

مالك يا زول الحاصل شنو؟ قال لي مزنوق لي في 500 ألف برجعها ليك الخميس الجاي، ضمان أصلو الولية عيانة وقالوا لازم تعمل عملية والقروش نقصت.

أها أنا شالتني الهاشمية وعندي قروش خاتِيها عايز أشتري لي شوال فول، طلعت منها الـ500 واتمنيت ليه الشفاء العاجل لزوجته.

زوجته دي نفسها البقت تتكلم معاي من ورا الباب بطرف نخرتها، ومرة قالت لي الزول دا ما قاعد يجي البيت، يعني تاني ما تجينا!

لي أكتر من شهرين كايس عضم رقبة تاج السر عشان يرجع لي قروشي ومافي فايدة، وصيت ليه ناس وكلمت زوجته وما لقيت أي حل.

في واحد صاحبو قال لي: رأيك شنو لو اتنازلت ليه من نص المبلغ ويديك النص التاني، ويا دار ما دخلك شر.

هو الشر دا كيفنو؟ كلامك دا ما يا هو الشر ذاتو، كيف يعني أدين لي زول وعشان يرجع لي قروشي أتنازل ليه من نص المبلغ؟ هسي دا كلام برضي ربنا؟

قلت: يا ود يا حاج صديق الما بخجل ما تخل منه ولا تخجل ليه. شلت عصاتي ومشيت دقيت بابه لمن عايز أكسره، والجيران طلعوا، وبقيت أتكلم بصوت عالي:

أطلع يا تاج السر، عيب عليك البتسوي فيهو دا، معقول 3 شهور أسكك عشان ترجع لي قروشي؟

المرة دي زوجته فتحت الباب ومدت راسها: تاج السر مافي، وبعدين مالك بتدق الباب دا كدا؟

بدقو وبكسرو، أنا عندي قروش شالها تاج السر عشانك إنت عشان تعملي عملية.

عملية شنو يا راجل؟ تاج السر مافي، ولو تاني جيت دقيت الباب دا بشتكيك في البوليس وهديل الناس شاهدين عليك.

اتلفت لقيت الجيران واقفين بسمعوا في كلامي وكلامها، مافيهم واحد قال بغم.

رجعت على قول الدوش، كبرت كراعي من “الزعل”، نص في الأرض نص في النعال. ولقيت نفسي بردد في منتهى الحسرة والندم أبيات الشاعر عكير الدامر:

احذر من تدين وتصبح إيدك طايلة

بكرة يفوت فوان واللعبة تصبح خايلة

الواحد يجيك معذور ودمعتو سايلة

بكرة يغيب يوريك نجوم القايلة.