شقيش

حبيب عبدالعزيز
شقيش الحق شقيش؟
والحد الفاصل إيش؟
بين خوفك وأكل العيش؟
والحق غايب مافيش
عشان الحق أعزل
والباطل حارسو الجيش
لمتين خافض راسي
لمتين أنا بمشى بشيش؟
واشوف الباطل واسكت
واقول يا زول معليش
ضميري يقوم يتحرك
واقيف قدامو دحيش
حقي وحقك واحد
بيناتم حد ما فيش
وكرامة اللبسو قطيفة
وكرامة اللابس خيش
شَبّكو البيوت فتيش
شَبّكو العروض هبيش
والحق شبع لطيش
وما عارفين شقيش
طبع الزمن دقيش
يلعبك الشيش بيش
طولت مبارى الطيش
ما بتسأل يوم شقيش
ما شفت أخونا غبيش؟
عريان ولحافو بريش
قام لى رزقو دغيش
في وشو يبين كريميش
وقناعتو تكفى الجيش
ما بسأل يوم شقيش
ما شفت أخونا عليش؟
بيتو الكبير قدر إيش؟
وحسابو في بنك العيش
ضميرو ميت موت
مابصحي بالتشتيش
في الفهلوة والغشغيش
في السلبطة والشرييش
ما بسأل يوم شقيش
والعارف قيمة الواجب
ما بشوف الحق طشيش
أصلو الجبان ما بكاتل
ما بحركو الحريش
ولا مرة حتى بيسأل
شقيش الحق شقيش؟