*مخاطبة للمتظاهرين في الوسائط اليوم . وغداً في الشوارع*

*بقلم : ابوبكر ضياء الدين

*”الدم السوداني واحد.. واغلى من خلافنا”*

* معاناة المواطن قتلاً ونزوحاً ولجؤاً..فقراً وجوعاً..إذلالًا وإهانة لإنسانيته….لن تنتهي الا بوطن وشعب واحد تحكمة إرادته وتتساوى فيه حقوق المواطنه ويدافع عنه جيش يخضع لدستور دائم وحكم مدني ديمقراطي.

يا أهل الثورة، يا أصحاب الصوت العالي، يا الدايرين سودان الجميع…

نحن الليلة ما طالعين عشان جهة. ولا عشان حزب. ولا عشان قبيلة.

نحن طالعين عشان كلمة واحدة: *الوطن*.

# *1. ليه نحن هنا؟ عشان

*”كفاية موت”*

شبعنا جنائز. شبعنا دموع أمهات. شبعنا بيوت بتتخرب وأطفال بخافوا من صوت الرصاصة والدانة.. وما سمعوا (صفقة) فرح..

*البندقية دي ما جابت لينا إلا الفقر والشتات.*

  

تجار الحرب دايرننا نكره بعض عشان هم يبيعوا السلاح ويحكموا على الدم.

نحن بنقول ليهم بصوت واحد:

*”كفاية موت.. عايزين نعيش”*

  

عايزين نقرا. عايزين نشتغل. عايزين أولادنا يكبروا بدون خوف.

#### *2. بنخاطب منو؟ “تجار الحرب.. أولادكم وين؟”*

اسأل نفسك السؤال ده وانت واقف هنا.

اللي حرضك على أخوك السوداني، ولدو قاعد وين؟

اللي قال ليك “شيل سلاح”، أولادو قاعدين ياكلوا ويشربوا برا.

هم برا الخطر. ونحن جوه النار.

*ما بنكون وقود لي معركة ما حقتنا.*

نحن ضد أي زول شايل سلاح في وش مواطن. ضد أي زول بفتن بينا. ضد أي زول شايف الكرسي أغلى من دمك.

           ضد كل كوز شايل سلاح او (دعوة زيف)..

#### *3. سلاحنا شنو؟*

* *”شرق غرب شمال جنوب.. كلنا سودانيين”*

هم سلاحهم البندقية والفتنة والجهوية.

وسلاحنا نحن *اللمة والوحدة*. سلاحنا إننا نقيف كتف بكتف.

نحن ما “شماليين” و”غرباويين” و”شرق”.

*نحن سودانيين بس.*

لما ترفع اللافتة دي، انت بتقول للدنيا كلها: السودان ده بيت كبير، بيسعني وبيسعك. لو اتفرتقنا، بنبقى لاجئين في داخل وخارج بيوتنا.

  

*السودان بيسعنا كلنا.. أو ما بيسع زول فينا براه.*

#### *4. مطلبنا واحد واضح:

*”#السودان_أولاً #وقفوا_الحرب”*

        *ما دايرين سلطة عسكر وكيزان. ما دايرين محاصصة دايرين إرادة الشعب هي التحكم

ودايرين حاجة واحدة بس: *السلام*.

دايرين الشارع يتفتح، والمدرسة تفتح، والمستشفى تشتغل.

دايرين نرجع نبني بلدنا بيدنا، ما نهدمها بيد بعض. دايرن العدل والقصاص ممن اشعل الحرب وايٌدها  فهو وحده من يتحمل ذنبها…

*يا متظاهرين…*

صوتكم الليلة هو البندقية الحقيقية. بندقية السلمية.

لما تقول “لا للحرب” وانت سلمي، انت كسرت هيبة السلاح.

لما تقول “أخوي” للزول المخالفك، انت قتلت الكراهية.

لما تقيف هنا، انت بتقول: *”أنا السودان.. وأنا ما للبيع”*.

*امشوا بالهداوة. امشوا بالمحبة. امشوا وانتو رافعين راسكم.*

*لأنو النصر ما بجي بالدم.. النصر بجي لما نفضل سودانيين ومع بعض.*

*#السودان_أولاً*

*#من لا لم يحمي الثوابت الوطنية ليس من الشعب ولن نرضى به في مؤوسسات الدولة*.