جلسة ما منظور مثيلا

بقلم: خالد ضياء الدين

بالأمس جمعتني ونسة مع مهندس عادل خلف الله ودكتور معتصم دونتاي والأستاذ عبدالباقي.
كان الموضوع عن الاقتصاد (يعني كلام كبار كبار) ولأني استفدت من النقاش أحاول أنقل ليكم الفائدة.
د.دونتاي يسأل: أين ذهبت الكتلة النقدية؟ يعني الكاش البقلل النقاش ودوه وين؟ بصراحة في الأول شكيت إنه يكون قاصدني بالسؤال ومخوني في كاشات البلد لأنه كان بعاين لي وبسأل!.
لكن الباش انقذ الموقف بقوله: الصحيح الكاش ما عند الناس العاديين، في جهة بتتحكم في الكاش وبتدي البنوك بالقطارة وإنو أقل من 20% من الكاش خارج النظام المصرفي، وإنو دي الجهة الماسكة السيولة، وقال كمان:
صحيح كتير من التجار بخزنوا في البيوت وأطراف العاصمة في خزن كبيرة وفي خزانات المياه وفي ناس بتخزن في مطامير لكن منو هم التجار ديل وتابعين لي ياتو جهة سياسية؟ انتو دايرين الجد، دا سؤال خطير وبجيبها ضقلها يكركب.
الحقيقة العبدلله فتح فمه مستعجبا
د.دونتاي بفتكر إنه الاستدانة من الجهاز المصرفي بتقلل من النقد الموجود، وإنه كتير من التجار الاتحجزت قروشهم في البنوك إتعرضوا لي خسائر فادحة لأنهم ما حركوها في بيع وشراء بنية الربح كما إنها فقدت كتير من قيمتها مع التضخم الحاصل.
الباش بقول ليه: الخطورة العلى الاقتصاد إنه الكاش اتحول لي عقارات وعمارات وكتل اسمنتية، وإنه بسياسات الدولة الفاشلة ح يتحول أصحاب الأموال الى تجار عملة بدلا عن الاستثمار في القطاع الانتاجي لأنها مضمونة الربح وسريعة العائد، وبقول كمان وحسب متابعاته إنه مافي زول الليلة بورد قروش في البنك إلا تغطية لشيك هو كاتبه، أو شيك معتمد ينزلو في حسابو وعلي طول يحرر شيك عشان يسحبها.
د.معتصم يتفق مع الباش ويؤكد ان التجارة بقت (كاااش داون)، عندك كاش تستلم ويضيف بسخرية بلد فيها أزمة تضخم ويقوموا يطبعوا قروش جديدة (عايزين يوصلونا لي وين)!
المهم يا سادة الموضوع كان طويل والكلام كبار كبار التقول كلام سيدي (شي بلفهم وشي مابلفهم) لكن طلعت منو بالآتي:
1/ البلد راقدي رميصة
2/ انه في طبقة مستفيدة من تعويم الجنيه علي حساب الأغلبية المسحوقة.
3/ إنه الميزانية فاشلة ومسايرة لي وصفة صندوق النقد.
4/ وإنه ح نشوف أيام سودا (ربنا يكضب الشينة)
5/ وإنه خزانات المياه بقت غالية لأنها بقت تستخدم كخزن ومخازن لحفظ القروش (اللهم أجعلها غنيمة لنا)
6/ البلد بقى فيها سعرين للسلع، سعر بالكاش وسعر بالشيك.
7/ وانهم كونوا لجنة مستقلة ومحائدة لمناقشة ضرورة تعويم الجنيه ووضع معالجات للأزمة الاقتصادية؟.
العبد لله هنا غلبوا السكات: هي حكومتنا دي حكومة مستقلة ومحايدة، ولاحكومة حزب؟
اذا حزب الحكومة غلبتو، اليقول غلبتني ويتخارج.
بالمناسبة اجتهدت ليكم حتى أتم النقاط للعدد 7 لانه بصراحة البلد دي محتاجة لي مسبع.