لك يا وردي أُغنّي

بدر الدين صالح

دام اصلو الحزن هو قديم

مجدّدو بي مشيك مالك

أم إنك ماش عشان كجراي

وإسماعيل حسن والدوش

وعشمان في قصيدة جديدة

يمكن تستفز لحنك

وجاي راجع..

ترتب بيها وجداني

وشوق شعبك

وشعبك لا يزال عايش

لهب ثوريتو ما ولع

ولا مارس ولا أبريل

ولا أكتوبر الأخضر قدر يرجع

مع إنو الكيل طفح بالجد

وكل متطلبات ثورة

بقت متوفرة لي حد

هدا الشارع.. ودا الظالم.. وداك الشعب

بس محتاج غناك الحار

يحرك مكمن الوجدان عشان يتعب

وإنت مشيت

عمومَا لو سألتني كان قبل تمشي

بقول ليك ياخ أغاني الدوش

كفايه علي بناديها

غنوة قدر تغرق شوقي

لا حدود مزاجو يقيف

وإسماعيل حسن أسفاي

دي جيناتا بتتنقز

في حنايا الروح

وسايلة مع دماي سوا

وحافرا بي كمنجة عربي

في عمق القلب مجري

إذًا ركز معا كجراي

وواصل في حوامتك ديك

وكان تعب الجناح حبه

أبدًا سرعتك لا تزيد

أنزل غابة الأبنوس

بتلقى صلاح وأمل دنقل

وناس لاقاها في جودة

أمل غنيلو آخر غنوة غنيتا

وناس جودة

حنبيهو البنحلم بيهو يوماتي

أما صلاح إذا سألك

عن الطير المهاجر

جا ورجع قرفان بلا عودة

وسلم لي بلادك.. ولي الحبيبة

وللمناديل الفي إيدا

للحبيب الكان بعيد

أما أنا..

أرجاني فوق الأمسيات

في المجلس الدافئ الوفي

أنا أصلي مشتاق لي لقاك

لم الحبايب مشتهي

وإياك تغني الذكريات

غنيلي سافر بالسلامة

وما تجي

مع إنو أزهري قالي

ما ضاق الوطن

ياخ ضايقة بي الحتة دي

ومحجوب شريف لسع مُصر

على رغم ضيق الحِتة دي

نفتح مسارات لي أمل

في بكره حتمًا راح يجي

وناداني بي صوت كلو شوق

وأنا كُت على وشك المروق

يا بويا يا محجوب شريف

أنا كُت على وشك المروق

بس هندا جيت

وياني أُسطه وجبت طلبه

ودي الكمينه

وهادي مونه ومسطرينه

نبني مدرسة.. نادي.. مسرح

كبري.. مستشفى.. ومصنع

جيت عشان هادا النداء

نبني نبني..

جيت وما قايل المهندس

هو وردي

صمّم الخرطة وفي بالو

إنو هادي الأرض

مليون ميل مربع

وقسموها قبل ما يمشي

مات بيحلم

لو تجاورنا بحسنى

لو تعايشنا

حنرجع لي تآلفنا القديم

بي رؤى سودان جديد

#ملف_الهدف_الثقافي #محمد_وردي #أدب_سوداني #ثورة_ديسمبر #وفاء #شعر