يوم الشرح

(حاجة المهلة) وحريم الفريق في حلة الشيخ (لحاق بعيد) عاملات ليهن صندوق .. والصندوق ماسكاهو
بت وهب الاستاذة واكانن (اطناشر مرة) قدر شهور السنة ..
وكل هلال الصرفة لواحدة فوقن ..
والصرفة بوقعنها على حسب الظرف القدامن وبدنها لأكتر واحدة محتاجة ليها والظرفها ضروري ..
وكلهن متفقات وقنوعات وطيبات ومتفاهمات ومستفيدات ..
والصندوق عملنو قبال كم حول ونفعن تب وعملن منو الدايرات يعملنو كلو في بيوتن عملنو !!
ومع بداية السنة الجديدة ومن اول شهر (ام نعيم بت الشباك) مرقت منهن والاطناشر بقن حداشر (وام نعيم) جارة (المهلة) الحيطة بالحيطة ..
(والمهلة) بصح سمحة المهلة .. مرة ممهولة وماهلة والفي يدها مو هيلها .. كريمة كرم يتحدثوبو الناس وطيبة خلاس وبشوشة ..
قبال الصرفة بيومين الحريم بتلمن كلهن في بيت واحدة منهن واليوم دا مسمياتنو (يوم الشرح) .
(المعنى العندها ظرف تشرح) ..
والمي محتاجة للقروش في شي بتتمهل لمن يجيها الدور .. والعندها حوجة وظرف بتشرحو ليهن وهن
بعد كدا بشوفن ويحددن الصرفة لي مني فوقن ..
ولو لقن اتنين منهن ظرفن ضروري والاتنين بستاهلنو بقسمنو ليهن النص النص دا والشهر البهل ..
يوم الشرح أكانت الجبنة في بيت (أمهاني) بت ود مختار .. وحاجة المهلة طيلة السنين الفاتت ومن يوم عملن صندوقن دا ما حصل شرحت ليهن ظرف واكانت بتشيل آخر واحدة فوقن ..
اليوم داك وبعد كل واحدي شرحت الظرف حقها حاجة المهلة قالت ليهن :
(الصرفة دي لي انا) !!
وابت تشرح ليهن ظرفها .. وقدر ما سعلنها منو ابت توريهن بيهو .. وعندها بتها الكبيرة مشتركة معاهن واكانت مغروضة في الصرفة دايرالا عدة واكانت بتحسب في الليام متين تصرف عشان ماشة عليها ولادة وسماية .. وشرحت ليهن ظرفها وديلك قالن بتستاهل ..
بس حاجة المهلة قالت ليهن :
(ان ما اديتني الصرفة دي ياني المارقة ليكن من الصندوق وواحدة منكن تسعلني من ظرفي شنو مافي)..
الحريم رضن مجبورات ما بدورن مرقتها ..
وبعد يومين ادنها الصرفة ..
وشالتها بصمتها ومشت ادتها (لام نعيم) جارتها ..
وجات بيتها ولقت بتها تهرج مع اخواتها وزعلانة من امها .. قامت مسكتها من يدها ودخلت بيها الاوضة وقالت ليها :
انتي القروش قلتي بتدوري تشتري بيهن عدة .. وبي عدتك ماك محتاجة .. المزعلك شنو ؟
المزعلني انك شلتي الصرفة ومشيتي اديتها (لام نعيم) وهي ولا مشتركة معانا لا خليتيها لي ولا استفدتي منها لروحك ..
(أم نعيم) جارتي وزي اختي .. ومحتاجة للقروش دي اكتر منك ..
لو محتاجة ليها ما كانت مرقت من الصندوق واكانت اشتركت معانا فوقو واكنا بنديهو ليها ..
تشترك بشنو !! وليها كم يوم لا ريحة قلوتها ولا ريحة كشنتها ما جاتني ؟
وانا وهي كنا يومي بنتبادل الملحات بالحيطة وليها أكتر من اسبوع ما رجعت لي عدتي الوديت ليها فوقن الملاحات !!
عشان ما قادرة تديني ليهن فاضيات !!
وقبل كم يوم ماشة في الدرب جاية من خالتك عزيزة جيت فوق دكان العبد .. لقيتو يزرزر في أمحمد راجلها في قروش .. ومرق منو يديهو فاضيات .. ابى يديهو حاجة .. وبقيت اكتر وأزيد ليها الملاح واملا ليها الصبارة جبنة ..
هي قالت ليك ؟ الجار ما بقول ، وما علا يقول .. آ بتي (وام نعيم) اكان كتلوها ما بتقول ولا بتشكي من عزة نفسها .. وقبيل بعد ما اديتها القروش قنبت تبكي .. وبراها الورتني بالحاصل وقالت : (راجلها ساب الشغل وما عندهم شي وقاعد يفتش .. والليام الفاتت عدوها بملحاتي )..
دحين مي محتاجة للصرفة اكتر منك آ بتي ؟؟
والرسول وصانا لسابع جار ودي جارتي الحيطة بالحيطة !!
– دي الأم البتعلم .. وتربي الأجيال ..
– ودا شارع الحله البربي ..
– ودا الجار البربي ويتفقد ..
للأسف تغيرنا وتغيرت التربيه .. أجمل شي نعيش في دنيا خلقت في ستة ايام .. ساهله وبسيطه ..
ليه نجي نعقدها نحن في آخر الزمان ؟
أتفقدوا جيرانكم وأهلكم ياناس !!!