زمن ضائع من عمرنا

بقلم: سارة منوفلي
#ملف_الهدف_الثقافي

واقفه تبكي
فاقده صوتك يا خليلا
والمعالم والعوالم
هي البتحكي
عن شجن فى السكة مرمي
وعن وليد أمو بتفتش..
عنو طال في بعدو ليلا
عن هتافك.. والأناشيد والحكاوي
عن غناوي..
وعن محبه تتترسم في كل حبه
قمحة ترقص بالعديله
يا مدامعك، يا مسامعك
شده طبلك من سكونك
دق ناقوس في الخيال
وجوع بطونك في قلبنا
قصة يحكوها الصغار
ولا شأنك ياك وليد الحلة ذاته..
سمرتك وأنبل صفاتها
وعرقك المدخور حلال
أصلو في بالنا وكلامنا
وأصلو إنت الزاد عمارنا
وكل معانيها البتبهج
والتفاصيل والجمال
إنت ياك يا عين وداعها
والتياعها..
وحزنها المدفون جبال
أوعا مننا يوم تشيلك
أوعا تنساها الشوارع
البتدفّق مداين
من دماك.. في مداك
يا كتير الارتحال
اتفقنا إنك الأمل المعانا
واختلفنا أنك الأمل المعانا.. والمعاناة
ولا من نفس الكؤوس
يوم حتسرق للنفوس..
لا بترحم لا بتخلي يلف يكوس
لا بتمد إيد بي لقيمة
لا تراب أرضك تسيبو
تروي من أجملها غيمة
لا حوافر، لا نوافر
لا طيورك شاده حيلا
تقطع أميالك تسافر
كل ميل والريح تشيلا
أبكى أغسلى دم شبابك
ده الانابك.. يا عزيزة
ألقى روحي تشابي ليك
وموج عيونك شال وجابك
يحكي في الحاصل عليك
اسأليهو..
كم جواب رسلتو ليهو؟ وكم رسالة
كل ما تكمل بترجع تشتهيهو
ختي في خاطرك بريدك
وبي وريدك دثريهو
أفرشي النيل لي ملايه
وليك مراية..
وزي قمرنا تطلي فيهو
ياما منك بعتزر
عن زمن ضيعتو منك
من عمر.. ما تحسبيهو