نوافذ الحنين والضو

بقلم: مدني النخلي
#ملف_الهدف_الثقافي
إلى روح الحاضر فجرًا يضئ، ووجهًا وضئ.. وصوتًا يحمل البشري هديلًا وصهيلًا وسلام.. الأستاذ الشاعر محمد طه القدال.

مرتين واقفين
علي باب الخريف
صابرين.. مع الشدو الحميم
راكزين تحت ضُلّو الوريف
ونصادم الزمن الأسيف
يا جرح الغنا
مدّت ضراعك وانتباهك
يا ولد صحوة ضمير الكلمة..
وأيديك المدد
ضاق اتساع الأمكنة
عكس اتجاه الأزمنة
واخترت منفاك البلد
روح حلّقت والفاني
يا صاح الجسد
كن بخير..
لطالما اخترت منفاك البلد..
حتة رقادك ومشتهاك
حر اتجاهاتك مشيت
اخترت بين الفقرا بيت
مالياك قناعاتك رضا
من مسغبة وجوع.. ما اشتكيت
بل اتكيت علي وعدك
الما بتخلفو
وكسبت يا صاح الرهان
مرتين والعيد يجي ويرجع أسيف
ما شفت كيف..
حزن الجزيره البيك خضيره
وخير دميره
وكنت قدالا وخريفا
القلتو كان ضد الهوان
عكس ارتهان حلم الغلابا
وسطوة الباغي الجبان
وكسبت يا صاح الرهان
وانفلتت
من الشدو الحميم صيحات
انتظمت هوى القلب الرحيم دقات
وابتهلت لخالقنا الكريم دعوات
تتضرع عشان عيون أطفالنا
ما تضوق الهزيمة
ويا صاحب رفيق البال
في البلد العشق قدال
ساء الحال، وحال الحال
واتيتم حلم أطفال
نزوح وين الخلق ما تروح
متاع الفانية ما هما
والوقعت بقت في الروح
ما زادا نقص كفا
ولا زرعًا عطش جفا
بقت في الناس
وفي الفات البلد قفا
جمعًا والمصير مجهول
علي أبوابو نصطفا
وساء الحال.. يا قدال
ما بتجيب سيرة الجنوب
وما بنجيب سيرة الخريف
اللمّا غيماتو وزعل
هم المساكين التِقل
باقي حتحات الدريش
الحبّه داخرنو وكِمل
الحسره فقدك واعظما
بي وراك بلدك همل
قريت ما خليت حكي
اسمعت. ناديت
واعتليت صهوة نهاراتك وضوح
شحتيف رويحة الروح.. ننوح
والشوق مستّف شوقنا شوق
شوق للبلود
الفيها ريحتك والعقاب..
كرفه في قبضة تراب..
سلام مرحب
ومارق للبجوك حفيان
سلام أهلا ما قصرت
وين ما كان تود.
وتمد إيدك للنده دركان
سلامًا للبيوت يوصل
ونضمًا من صباحك بان
يطارد في العتامى صهيل
صدح وعد القصيدة هديل
وجوك أهلك
بشاير البيك سحابا يشيل
ويا قدال عشا الحلال
في القدله العليك بتخيل
سلام تعظيم. سلام تعظيم
يا البلد الولد قدال ويا الولد البلد قدال
كن بي خير، وطيب الحال..
وعال العال..

4 يونيو، ذكري الرحيل المر