صنع الله إبراهيم.. الكرامة أغلى من الجوائز: أحمد فؤاد نجم يرثي زمن المهرجانات ويحتفي بموقف المثقف المتمرد

صحيفة الهدف

الله يجازيك يا صنع الله
يا ابن الكلب يا مجنون
خلاص مش قالوا فضّوها
لا عاد عنتر ولا شمشون
تقوم أنت اللي تعملها
وتحرق ورقة المأذون
أديك نيلتها بنيلة
وضربت يجي ألف زبون
زباين جايزة الدولة
يا صنع الله أمم أبابيل
تاريخ في الرقص ع السلم
وهز البطن والشخاليل
تروح فين أنت ولا إحنا
وباقي الهبل والمهابيل
دا علم وموهبة وخبرة
في فن اللعب ع المضمون

قالوا له حرام يا صنع الله
تقول ع النعمة دي رشوة
ما غيرك خلق لهفوها
وحلوا المشكلة بعشوة
ح تلبس برقع العزة
وتعمل فيها طيز وزة
وتتكلم عن الإنسان
وعن مجد العروبة زمان
دا يبقى جنان يا صنع الله
وطبعاً أنت مش مجنون
وقامت قومة المهاويس
وأصحاب اللعين إبليس
وصبوا الجاز على البرواز
ومارسوا الكذب والتدليس
وناس لعنوه
وناس جهّلوه
وناس وقفوا له ع المتاريس

نطق صوت الزمان عالي
وقال الواد ده يبقى عريس
يزف الفرحة للمحروم
ويأنس وحدة المحابيس
وضوّى الشمع في الكوشة
على صنع الله ابن إيزيس.

Be the first to comment

Leave a Reply

Your email address will not be published.