ونسة

مهادن الزعيم

¶ في ناس كتار بمروا علينا في حياتنا؛ فيهم البخلِّدوا ذكرى، وفيهم البمشي ساي. لكن في ناس بفضّلوا محفوظين جوانا بحاجة بسيطة: لحن عجبنا، نص شعري بنحبّه سوا، أغنية بتشبهنا… وكل ما تصادف الحاجة المشتركة بينكم دي، بتنط شخصية الزول الكان بشاركك حبها في راسك. والحاجة دي ح تستمر معاك للأبد، حتى لو كل زول فيكم مشى في اتجاه.

¶ في ناس كتار ارتبطوا في ذهني بحاجات بسيطة. مثلاً، كل ما أسمع مدحة البرهانية بتاعت «الحب كنز والصفاء مفتاح»، بجي في راسي رفيقي حسن بكري. وبرضو لو قابلت حسن، بتذكر المدحة؛ يعني الاتنين بقوا عندي بنفس المعنى. وبرضو لو سمعت موسيقى الطوارق في أي حتة، بتلفت أفتش صاحبي يوسف وين؛ لأنه مهووس بأغاني الطوارق.

¶ صديقي ورفيقي عثمان الجعلي، كل ما أسمع عصام الطيب، بتجسد عثمان قدامي؛ لأنه هو أول زول سمعني مدحة «السراي» لعاصم الطيب. وبقينا كل ما نتقابل ونقعد جمب بعض ونسمع المدحة بسماعة سلك، كل واحد يشيل فردة، ونفضل ساكتين ونحن بنسمع. وممكن عادي نسمع المدحة دي ساعة كاملة من غير ما نتكلم مع بعض ذاتو.

¶ لو جاتني رسالة من أي رقم غريب أو حساب غريب، مكتوب فيها: «قالت غيمة (بين قوسين غيمة لئيمة) أطفال الشارع فهرست لي كل المدن»، بعرف إنو دا بابكر شيركو، مع إننا لينا سنين ما اتقابلنا ولا سمعنا صوت بعض. وبرضو لو ماري في أي حتة وسمعت صوت محمود درويش، بتجي في بالي آمنة حماد ونقاشاتنا الجميلة حول «الجدارية» وباقي أشعار درويش.

¶ عندي صاحبي من بورتسودان اسمه محمد جمال، بتذكّرو بأبيات شعر كتبها أحمد فؤاد نجم، بتقول: «ممكن أعرف مين الأول بيكلمني؟ نحن نيابة أمن الدولة… دولة مين؟ دولة مصر… مصر العِشّة ولا القصر؟»؛ لأنو صاحبي دا كان بيرددها كتير، واشتركنا سوا في حب أحمد فؤاد نجم. أما صديقي السيد العال، مجرد ما أشوفو بتذكر الدوش، ولو سمعت الدوش بتذكر سيد. وحاسي إنو في رابط بينهم بتمثل في بساطة المفردة وقوتها عند الاتنين؛ عشان كدا عقلي الباطن ربطهم سوا.

¶ الخلاصة: مش كل الناس بتركو جوانا ذكريات شينة. فياريت نفتش عن الحاجات الحلوة الكانت بينا وبين أي زول كان أو ما زال جزء من حياتنا، ونخلي الحاجة دي هي العنوان البِنحفظو بيهو ونتذكرو بيهو، مهما كانت تقلبات الأيام وغدر الزمن.

سلام ومحبة.

#ملف_الهدف_الثقافي #ثقافي_الهدف_105 #ونسة #أدب_سوداني #ذكريات #ثقافة