أمير الأمين معلا الأمين
عليك حامت طيور الشوم
يا وطن مجروح مليتنا هموم
مرقنا تحت سماك كايسين
أرض نفرش عليها ننوم
وفي كل يوم رفعنا يدينا
لي الله الطف بينا يا قيوم
دا ياهو الحال مع الترحال
وكلو عفشنا ما بنشال
نزوح هدانا مشوارو
عشان نسلم عدمنا المال
في أي مجال مرقتا ضراعنا
محتاجين نجيب لي عيالنا لقمة حلال
ومازال السؤال مطروح
شنو الخلى الظلم مسموح
ملامح الحيرة في وجوهنا
تكون لمتين حياتنا نزوح
بكل وضوح خلاص ملينا أوجاعنا
ومن حالتنا ضايقة الروح
مع التقصير فقدنا كتير
ومستقبلنا كان تأخير
خلاص خلونا نتصالح
بدل طلقات يكون طبشير
سوياً نسير وننسى خلافنا
نتكاتف والداخل وسطنا يطير
كفاية حـ.ـرب كفاية نزاع
قضيتا زمنا كلو صراع
وطنا وطن فريد واحد
نعيش في غيرو كيف لو ضاع
نقيف ننصاع نولي خيارنا يحكمنا
وحياتنا الدامسة تلقى شعاع
Leave a Reply