نفوتك وين؟

منى الرشيد نايل

وانت لسه في الوجدان،
محكّر في سواد العين،
نفوتك وين؟
نضيع بين البلاد، تايهين،
وانت دربنا،
وانت قلبنا.
كيف الروح تشق دربين،
وكيف قلبًا هواك حبّاك،
وأضناه الفراق والبين؟
مقسّم في شتات الغربة،
مليان لوعة شوق وحنين،
يضيع في هواك،
يدور يبراك،
يصير قلبين:
قلب تايه،
قلب ضهبان،
ملان أشجان، ملان أحزان.
يفتش في عيون الناس
عن الأوطان،
وعن إحساس حضن دافئ،
ملان حنية، حب وأمان.
قلب تايه
يحاول ينسى كل أحزانه،
لو يقدر على النسيان،
يعيش رغم الوجع والغربة،
يتحدّى الزمن إنسان.
وبس قول لي، نفوتك وين؟
وانت الجوّه جوفنا الفرحة،
فرّة طرحة روح منشرحة.
لما اتغربت أرواحنا بينات البلاد في لمحة،
لما نزحنا، شلنا جرحنا،
سرقوا عمرنا، شالوا الفرحة،
شلنا معانا كل منانا.
في يوم بكرة نوعى ونصحى،
نلقى الماضي فات بي شرّهُ،
وأيامنا ازدهت زي لوحة،
عادت لينا دارنا السمحة.