جبال

علاء بابكر سنهوري

طلعت جبل الليل

لقيت سهرانه ناس مجروحه

ناس مفتوحه ليها جهات

مصائر مختلفة أشكالها

لقيت النور ببوح لهفات

ودقّات القلب مخنوقة

ودمعه بتبتدي الشلال

وأحوال خطوة عترانه

وخمشة انتظار

مغمولة في ضليله

وباقي غناوي محزونين

لقيت آدم

بقول أسماء ملايكه كتار

ونوح حطّاب

تجيهو الغابة ما معطوبه

والمحبوبه فـِ المركب

وإتنين للحياة الجايه

وهذا الطوفان

طلعت ضياع

لقيت وجهات كتيرة

لقيت البوصلة المجنونة بتأشّر

هناك شمعة

ضلاما

في كتف الليالي علامة

وهناك كهوف

لقيت مأهولة بالهجرات

لقيت أشباح بلغات مجهولة

وكان كل السقوف واطية

وغبار فـِ كلامها

لقيت روح

زمن معطونه فـِ الغيبوبة

لامن شامتها اتمسحت

بقت فـِ خدر

واقفة وحولها الأيام

وإذا ما خطوة

نزحت قدرتها المغبونة

لما فتر

هناك عبرنّها الأقلام

قصائد

إشتهاها وتر

قيامة

وسكّة فيها خطر

هدي الصحرا

طلعت جبل أبوي

طلعت ملان مهابة وإحتياج

وندوب

طلعت صبابه

لي روحو المشت فِـ شبابها

طره كتابة.. طره كتابة

قلت أشوف

لقيتو طبيب إذا انهديت

لقيتو حبيب إذا انصديت

لقيتو الباب

وحوش البيت

ومفتاح الصباح كل يوم

لقيتو بطبّق الآلام

وبيفتح صدره لي قدّام

لقيتو بخلّي دكان المحبة معبّا

وبيتحمل ديون

بيتحمل سـ.ـجون أحلامنا

تتحقق على حسابو

هذا كتابو

قريتو فهمت متأخر

طلعت جبل الأمهّات بالليل

مخدات الحنان

طلعت شقاهن الفطره

سهرانات يعصرن حُمّى

لامن تنضح الحتّات

يفطّو مناهن النومات

يفطّو سطور حياة ويقرو

أبجد للطفولة غُنا

وأبجد للمدارس تبدأ قولها بُنا

أبجد للصبايا

وللحكايات والمرايات

والرواية تحت صبرهن

وأبجد من عمرهن للنهاية

نحن الكان عمرنا قمح مداهو

وما حلمنا سمح

ما حلمنا كما اشتهنّو

حلمنا وأمهّاتنا نتح

أمهّاتنا دوا وجرحنا مُلح

هذا الليمون

طلعت الشـ.ـهداء فـِ السـ.ـودان

بنات ياسمين

وأولاد فوق من الأحزان

كراسات غياب

وقبول

وخلّونا

البلاد في ذمّة الحاضرين

خلّونا بنلقط فـِ ابتساماتهم

وونساتهم

وآخر مره شفناهم

خلّونا وكأنو حـَ نلتقي بعدين

ومنتظرين

ندمنا لأنو

ما شلنا البكفّي سفرهم الأبدي

لأننا كُنّا خلف المـ.ـوت

وقت رافعين بسالاتهم

ندمنا لأنو

خلّينا البلد حدّت

وخلّينا الجيوش عدّت حدود ثكناتها

هذاك المـ.ـوت

طلعت جبل أساي

لقيت في قمّتو البُركان

#ملف_الهدف_الثقافي #علاء_بابكر_سنهوري #شعر_سـ.ـوداني #جبال #أدب #السـ.ـودان