يا أم ضفاير

الشاعر: عبيد عبد النور

يا أم ضفاير قودي الرسن

واهتفي فليحيا الوطن

أصلوا موتى فوق الرقاب

كان رصاص أو كان بالحراب

البدور عند الله الثواب

اليضحّي وياخد العقاب

 

يا الشباب الناهض صباح

ودّع أهلك وامشي الكفاح

قوّي زندك وموت بي ارتياح

فوق ضريحك تبكي الملاح

 

يا كبار البلد الأمين

السكوت ده بيصح لمتين

بيّنوا لينا الرأي المبين

التكتّم هسّع مشين

 

ما بتشوفوا الذل والهوان

مصّ دمّانا وعقب امتهان

غنمونا حفظوا الأمان

بالنبابيت والخيـزران

 

قوّة هايلة وإيمان ضعيف

إنجليزي ومخلوق رهيف

طابية في قصاد زول نحيف

بطنه خالية وإيمان نطيف

 

إنتِ غالية وهم رخصوك

إنتِ سمحة وهم وسخوك

إنتِ لينا وحياة أبوك

نمشي ليك فوق نيران وشوك

 

الشوارع بتسائلن

بالعساكر يتمايلن

البنادق يتلامعن

والمدافع طبعًا يجن

 

إنتِ عارفة وما بعرفوك

إنتِ نورنا وعمدًا طفوك

إنتِ روحنا وفي النار رموك

ضحكوا بينا ونصبوا الشّروك

 

واستبدّوا وسوّوا القدر

وقالوا نحن السما والقمر

وأنتِ مش من نوع البشر

البقول البم يبلع حجر

 

حالة صعبة ومسرح فتن

دنيا فانية وفيها المحن

نحن نصبر لمن يحين

هاتفين فليحيا الوطن

#ملف_المرأة_والمجتمع #شعر_سوداني #عبيد_عبد_النور #الوطن