أرنب نط.. واتفاق نط!

عزو شين

قالوا في مغترب، كلما رجع إجازة يخطب ليهو بنت سمحة.. وقبل ما يسافر يوصّي صاحبو ويقول ليهو: “راقب لي الخطيبة.. شوف سلوكها وطبعها ومعاملتها. لو لقيتها كويسة رسل لي وقول: كويسة. ولو لقيت فيها حاجة ما تمام.. رسل لي وقول: أرنب نط.. وأنا طوالي برد ليك وقول: “تراني بنط”! وبفسخ الخطوبة بلا أي تردد..

وهسع، سبحان الله، البرهان عامل زي المغترب ده بالضبط! كلما يقبل مبادرة للسلام مع الدعم السريع ويوافق عليها، يمشي يوصّي الجماعة الطيبين يدرسوا الاتفاق.

ولمن الجماعة يقولوا ليهو: أرنب نط.. البرهان فوراً يعمل: أرنب نط، ويطلع من الاتفاق بلا تردد..

وحصل دا في اتفاق جدة.. اتفاق المنامة.. واتفاق جنيف..

والآن في اتفاقو مع مسعد بولس، نفس الجماعة الطيبين قالوا ليهو: أرنب نط.. وبرهان كالعادة نط.

لكن الخوف الكبير ما هنا ..الخوف إنو البرهان يحصل ليهو الحصل للمغترب ذاته!

المغترب ده في آخر خطوبة عمل نفس السيناريو :وصّى صاحبو يراقب الخطيبة. وبعد ما سافر، مشى صاحبو يتونس مع الخطيبة ويشوف “ملفاتها”

قال ليها: “خطيبك بسأل عنك”.

الخطيبة ردّت :”كدي سيبك من خطيبي.. إنت أخبارك شنو؟”..

المهم.. رسل لصاحبو رسل وقال ليهو: أرنب نط. والمغترب فوراً عمل أرنب نط وفسخ الخطوبة.

لكن الكارثة كانت في الإجازة البعدها.. المغترب رجع ولَقَى صاحبو ذاته البقول ليهو أرنب نط متزوج الخطيبة الأخيرة..

عشان كدا ..أنا خايف الجماعة الطيبين البقولو للبرهان: أرنب نط.. بكره يقوموا هم يوقّعوا الاتفاق النَطّ منّو البَرْهان..

 #أرنب_نط #البرهان #السودان #اتفاق_جدة #مفاوضات_السودان #الدعم_السريع #ساخرة #ملف_الهدف_الثقافي