اللوم عبر الأثير

محمد ساتي حمد
#ملف_الهدف_الثقافي

زمان قالوا كان في عمال شغالين في البريد والبرق، واحد اسمه عمر والتاني اسمه محمد صالح، أصحاب شديد و”فِرد للطيش”.. يومهم كله حفير في أعمدة التلفونات ودفن الكيبلات، وآخر ونسة وضحك مع بعض اليوم كله.

أها، في يوم من الأيام، أبو عمر مات الله يرحمه، محمد صالح صاحبه وفردتو للتعترو، وتسود يومه طنش عمر وما جاه وواجبه وعزاه في وفاة أبوه.. دارت الأيام والسنين ولفت وكحال الدنيا الدوراة، قام يا أبو محمد صالح بعد عمر طويل مات.

المهم بعد كم يوم من الوفاة، وبعد انتهت الإجازة، محمد صالح رجع الشغل، وبيني وبينكم كان زعلان شديد من عمر، فأول ما وصل المكتب قبّل على صاحبه عمر وقال ليهو قدام ناس المكتب وبصوت عالي النبرة:
“يا صاحبي، ليه ما جيت عزيتني في وفاة أبوي؟ ما عيب منك الكلام ده؟”

فقال له محمد صالح رد لي بسرعة شديدة وبزعل وبصوت أعلى نبرة منه وقال:
“والدفناه زمان داك كان كيبل؟!”

ومن ديك الناس مسكت في كلمته ومقولته (“الدفناه زمان داك كان كيبل؟”)، وكمان معاها حبة توم وشمار ومويه.. ودفاع مستميت: كان جاني كنت جيتو ومشيت ليه وواجبتو، وطالما أنو ما جاني ما بمشي ليه. كان كسر رقبتو كش كده ده، وكراعي دي تتقطع حتت، كان عتبت بره باب بيتنا ده ومشيت ليه، ومسلسل النبذ يستمر مالي ومالو. ده زول متفلهم ومتقرضم وشايف نفسه شديد، تصدق في زواجي ما جاء خالص ولا دخل على في الخاص (عفوًا أقصد ما جاني بالدرب العديل ده)، وكمان بجاحته وصلت حتة إنه ما عمل إيموجي (عفوًا ما اخت في الكشف) بالرغم إني دفعت في مناسبة في بيتهم جنيهات.. جنيه ينطح جنيه.

عشان كده أنا حا أبلكو (عفوًا قاصد أقاطعو)، ومن هسع بوريك يا صديقي، القطعة دي بس حتكون زي قطعة الكهرباء والمويه.. يعني بالواضح كده لو، ولو تفتح باب الشيطان، لو رجعت المويه والكهرباء أنا مستعد أعيد المياه لمجاريها.. (وعليك الله أفهم يا أبو مخًا تخين)..

هسع يا شباب، اللوم والمجاملات كمان دخلت عالم السوشيل ميديا والسياسة ومنصات الإعلام والقروبات والبيوتات الصغيرة، وبقت:
ملاح ويكه تلايقني بلايقك (عفوًا تلايكني بلايكك)، تبوكني ببوكك، تعلق بعلق، تتاوق بتاوق، وهلم جرا وكسرة وفتحة..

ومن هنا بوجه دعوة في العام والخاص للمتابعين للتعليق والكومنتات والمباكوات (من أصل كلمة بوك)، ومزيد من الإيموجيات المجيهة والفرايحية.. والعجب من زول مشهور، عوووك ده حيكون يوم حلو ومابخلص، والعاقبة عندكم في البوستات.

#ملف_الهدف_الثقافي
#محمد_ساتي_حمد
#سودان_السوشيال
#قصص_واقعية
#الحياة_اليومية
#التراث_الشعبي
#الفكاهة_السودانية