وضوح بكراك

مدني النخلي

#ملف_الهدف_الثقافي

…. ….

تقوم وتقع،

تقع وتقوم،

ساند الحيل وضوح بكراك

صمود الشارع الربّاك،

على البلد العزيز وصّاك

ماني الخاب وسمّوني،

يا أمي العزيزة.. جناك

محل قبل بشوف رايات،

وخيلاً بالنصر جاي.ات

وماكِ براكي والدّاني

كتار البِبْقوا لي أمّات

كتار إخواني والأخوات

كتار خالاتي والعمّات

غنّيتن بشاير الجاي

ركزت الحيل على الغنوات..

يا ولد البيوت والنيل،

ويا بت السحابة تشيل

بريدكم والله زي عيني،

مسردِب لي همومي أشيل

واقفين والثبات هيلكم،

حالفين تعدّلوا المقلوب

ساندين جدار مغلوب

وحافظين كلام “محجوب”

ما شايفين طشاش أوهام،

ولا نجم اليقين محجوب

سلام للصوت صهيل مغبون،

وإيد قَشّت دمع ممكون

ثبات الموقف المبدأ،

لا منحاز، ولا مرهون.

يقوم ويقع ساند الحيل

وضوح بكراك،

صمود الشارع الربّاك،

على البلد العزيز وصّاك

وماني الخاب وسمّوني،

يا أمي العزيزة.. جناك

 

#مدني_النخلي #وضوح_بكراك #شعر_العامية_السودانية #صمود_الشارع #السودان_ثورة #الشعر_والوطن