#ملف_الهدف_الثقافي
من يقطع حبل الأفكار المجنونة
اللي هاتخنق عقلي ويسيبني أنام
من غير ما أفكر
في النفس الداخل والخارج من صدري
من غير ما أخاف
من الثقب اللي بيوسع أكتر
في غلاف الأرض
والأرض اللي في دورانها بتقرب من الشمس
والشمس اللي بتفقد كتلتها
بمرور الوقت
وقانون الجذب وقانون الطفو
وبداية الخلق ونهاية الكون
والخوف اللي بيتملك قلبي ساعات
من غير تفسير
وخصوصًا بالليل لما تنام الناس
والدنيا تبقى سكون والشارع هس
وأحس إن أنا محتاجة أصلي
صلاة الخوف
وأتعوّذ من شيطان النفس
وقبل ما تبدأ صلواتي
يسألني بخبث: إيه يعني شيطان؟
مخلوق زينا بيعيش ويموت
وبيشعر ويحس؟
أو فكرة اتولدت فينا وبس؟
وتاخدني الفكرة
وهذا الكائن فيا
لوادي بعيد مسكون بالجن
وأشوف الجن
شلة أصحاب قاعدين على قهوة
بيدخنوا شيشة ويسبّوا الجن الحاكم
المتهاون مع واحد من الإنس
اتجرأ مرة وشكك في وجودهم
وأخاف يكتشفوا حقيقة أمري
أتحوّل كورة
يلمحني أصغر واحد منهم
ويشوطني بقوة.. يحدفني لكوكب تاني
أحس كأني مجرد قزم
عمال يصغر.. يصغر.. يصغر..
وأحس كأني حبة رمل في صحرا كبيرة
أو صفر يتيم
محتاج في وجوده لجدول ضرب
أنا جزء في كل وكل في جزء
أنا ورقة في شجرة وشجرة في غابة
وغابة في عالم لا متناهي
أنا طير ونبات ونجوم ماتت
من كام مليون سنة ضوئية
أنا عطر في زهرة وسم في أفعى
ونقطة مية في بحر
بتعيد تدويرها يوماتي
حرارة الشمس
أنا بحر وصحرا
وريح بتهيج وتعيد تشكيل حبات الرمل
أنا موج بيعافر طول الوقت يعدي الشط
أنا مد وجزر ومصدر طاقة
موجب فرح وسالب حزن
يتحدوا في ذرة
يتخلق فيا دقة قلب
أنا عقرب ساعة ليلاتي
بيزحف يمّ الموت
وأتخيل روحي لما تموت
أتخض وأفِز بسرعة
أتحسّس وشي وإيدي ورجلي
ألقاني تمام
أنفض عني غبار كل الكوابيس
وأحاول أنام
أتعوّذ من شيطان النفس
والصبح أواصل يومي
كأني جريحة حرب.
Leave a Reply